2. Tag Innsbruck

Zägg isch Nacht au scho wieder dure. De Kevin hät am Morge am 6i Chileglogge ghört. Ja die Chile isch au grad näbed drah. Ich han nüt ghört. Am 8ti simer dä ufgstande und händ eus parat gmacht. Ih dem Hotel hämer kei Zmorge buecht, darum simer au grad ufs Velo ghockt. Ich han grad mis neue Navi fürs Velo testet und muss säge... es isch gar ned mal so guet😅 mir sind eifach z'schnäll unterwägs gsi. Ufem schöne Velowäg am Fluss entlang simer dä id Altstadt vo Innsbruck cho. Dete hämer Velo noimed ahnegstellt und sind verusse bimene Kaffi ahneghöcklet und händ euses Kaffi und zmorge gnosse. Dä hämer überleit wasmer no so wänd mache. Es isch eich schnäll klar gsi, dassmer de Berg deruf wänd. Also hämer eus uf de Wäg richtig Top of Innsbruck gmacht. Schliesslich hämer die Nordketti chli gneuers ahluege welle. Zerst simer mitem Zügli zude Haltestell Hungerburg und dä umgstiege uf Seilbahn bis ih Seegrube ufe. Dete simer namal umgstiege für die letst Seilbahn, dassmer dä würkli über 2300 m über Meer sind. In Hafelekar ahcho hämer eh wahnsinns Usblick über Innsbruck gha. Mer händ dä no en chline Spaziergang gnoh, dassmer nochli höcher gsi sind.
Nachher simer wieder eis abe und is Resti. Bi mega ussicht hämer es Jauseplättli gnosse.
Womer dä wieder ganz unde ahcho sind, simer chli dur Altstadt gschländeret händ es Gelati und en Apero gnosse.
So und jetzte wämer no go Bädele. Also simer mit de Bikes wieder zrugg is Hotel und händ eh abchüehlig im Pool gnoh.
Da s'ässe im Hotel so guet gsi isch, hämer grad namal dete gässe. Isch wieder sehr fein gsi und en Kaiserschmarren häts au no geh😋
Müed simer wieder is Bett gheit und händ gli gschlafe.Läs mer