E ungwollt länge Reisetag

Üses nächste Ziel vo üsere Reis isch Linköping. Ds isch zwüsche Göteborg und Stockholm. Mir si am Vormittag ufe Zug wo me het müesse reserviere. Dä isch aber scho e halb stund z spät abgfahre, was chli blöd isch gsi, wiu mir oh genau so viu Zit hei gha zum umstige in Katrineholm. Drum hei mer scho mau afa luege, wenn das de dr nächst würd fahre u hei gmerkt, das Züg vo Katrineholm uf Linköping nume au stund fahre. Irgendwenn ungerwägs isch de dr Zug nomau länger zum stah cho. Wiso wüsse mer leider nid, da Durchsage nume uf schwedisch si cho u mir absolut kes Wort hei verstande. 😜 Nach eme zitli simer emu de witergfahre u mit über eire stund Verspätig z Katrineholm acho. Aber isch no gäbig gsi, wiu so heimer emu de nüm lang ufe Aschluss müesse warte. Ungerwägs simer a vielne See verbi gfahre u schöne Herbstlandschafte, hei gläse oder gfachsimplet, was äch dr Zugbegleiter i sire Durchsag het gseit. Mir si guet acho in Linköping (oh wes 1.5h später isch gsi) u si de ga esse u no bitz dür z Städtli gloffe. Hie gäbs es cools Freiliechtmuseum, aber ds isch hüt leider zue gsi u morn tuets üs oh z spät uf für das mer no chönnte gah. Drum ischs iz eifach e Zwüschestopp u morn geits für paar Tag id Houptstadt.Read more