Zrügg in Argentinie

Gester simer mit dr Fähre vo Colonia del Sacramento wieder uf Buenos Aires übere. Mir hei diesmau es Hostel miz ir Stadt gha u ds Hostel isch würklech 10/10 gsi. Z Buenos Aires acho hei mer afa mau üsi Wösch bracht u ner simer doch no iz Reserva Ecologica (letscht Wuche ischs ja zue gsi). Mir si übere Stund dert spaziert u hei d Natur gnosse. Es het sech auso glohnt, dä Park no z bsueche. Im Hostel heisi am Abe no e gratis Tango Kurs abote u ds hei mer üs nid la entgah. So heimer die erste Schritte Tango glehrt 💃

Hüt morge simer fein ga zmörgele, ga Wösch hole u hei no fertig packt. När simer de üses Outo ga hole, womer iz drü Wuche gmietet hei. Us Buenos Aires usefahre geit lang u brucht nerve. Vierspurigi Outobahne wärde nämlech oh aus sächsspurigi brucht, ispure isch glückssach u inedrücke ohni z blinke völlig normau. Irgendwie heimers gschafft u si gäge Norde ufe gfahre, hei no i kouft u z Mittag gässe unterwegs. E Stund vor üsem erste Ziel hei mer scho zerste mau Bekanntschaft gmacht mit dr argentinische Polizei. Mir hei z Abblendliecht nid igsteut gha u ds wär obligatorisch. Drum hani däm Polizischt huufe Frage dörfe beantworte u ner e Buess übercho vo 37'500 Pesos (öpe 40 CHF). Di dörfe mer iz morn no ga zahle. D Polizischte si aber aui sehr fründlech gsi u mir si in Concepción del Uruguay acho i üsem herzige Airbnb. Morn näme mers einisch chli gmüetlecher.Weiterlesen