Mendoza, du gfausch üs...

In Mendoza heimer mau chli meh Zit. U wiu mer die letschte Täg so viu di ghocket, simer zersch mau ufe Cerro de la Gloria gloffe, ds isch quasi dr Husberg vo Mendoza. Vo dert het me trotz de paar Schleierwolke de zerste mau d Ande gseh u mir si mega beidruckt. Ufem Gipfel hets es Monument gha u me gseht super ufd Stadt abe.
Nachem Cerro de la Gloria simer ume heizue u dert heimer üsi Nachbarin troffe. Di armi het sich usgsperrt (hie muess me immer mitem Schlüssel usem hus, süsch chunsch nüm ine) u het niene here chönne u het oh kes Handy drbi gha. Mir hei se afa mit i üses Airbnb gnoh zum ufwärme (duss sis herbstlechi 10 grad gsi u si het nume churzi hose u hoodie an gha). Dert heimer chönne ame Schlüssudienst alüte u si het mit üs uf dä gwartet. Bi dere Glägeheit heimer natürlich no chli für Tipps gfragt. Si het üs es Wyguet empfohle, womer de när am Nami no si häre gfahre.
Si isch auso wieder i ihri Wohnig cho u mir si zur Bodega Viamonte gfahre u hei dert afa mau es feins Fleisch- u Chäsplättli gässe. När hets e Füehrig gäh dür z Wyguet u mir hei dörfe Wy degustiere. In Argentinie gits e huufe Malbec. I ha wieder sehr viu über Wy glehrt. Mir si oh es chlises Grüppeli gsi, no mit zwöi Brasilianer:inne. Di si mega herzig u offe gsi. Si hei super Werbig für Brasilie gmacht u i gloub, dert here muesi de öpe oh eis.
Nach dem länge Tag simer ume heizue, hei öpis kochet u si ner früeh ga liege.Read more