B wiä Buess & Bärner

Hüt Morgä si mir mau chli lenger blibä liigä, da ds Wätter nid so schön isch gsi.
Mir si am Vurmittag när ids Stedtli fürä & si dert i div. Lädeli chli ga lädelä. Dür ds Stedtli si mir ono chli glofä & hi no ds Hotel usfindig gmacht wo dr Bärnerkolleg vor Sandra übernachtet. Mir hi im nä Kaffi no öpis chlises gässä & si när mit em Camper zur Talstation vor Jasper Skytram gfahrä. Wo mir bim Camper si gsi, hii mir no ä Parkbuess vo 65.- Dollar uf dr Windschutzschiibä vor gfungä.😅 Itz wüssä mir ömu o, ds mäh nid gratis cha parkierä..
Trotz schlächtem Wätter si mir dert när uf ds Gondeli wo üs ufä Bärg uechä bracht het. D‘Gondufahrt isch mega iidrücklech gsi, da mir ds Usmas vom Waudbrand no mau gseh hii. Dobä acho, siimer hurti chli usä ga d‘Ussicht uf Jasper & ufä Campingplatz ga gniessä. Das sehr gluftet het & Schnee gha het, siimer när gli mau iichä ga näs Tee trinkä.
Mir si när gli drufabä wiedr mit dr Gondlä retour & zrugg ufä Campingplatz.

Mir si när ga Duschä & hii üs zwäg gmacht für i Usgang. Ä Volgchund vor Sandra isch im Momänt o gd ds Kanada & wiäs dr Zuefau wot, isch är mit sim Kolleg diä Nacht gd z‘Jasper gsi. Mir hi üs i ihrem Hotel Pub troffä für zämä z‘Ässä & äs Bierli z‘näh.
Äs isch ä mega gmüetlechä Abä gsii & mir hii mega lang zämä gredt & drzue no ä NHL Hockey Match mit verfougt. Ig ha mega früüd gha, het ds mit däm Träffä klappet gha & has richtig gnossä wiedr mau mit Bärner z‘redä.🍻🍴🏒☺️
Da si ä längä Tag hii gha & am nächschtä Morgä uf Kamloops wii ufbrächä, si mir de so churz vor dä 11i wiedr zruugg ufä Camping gfahrä & o gli ga liigä.Read more