Kanada

Hüt Morgä hii mir iis uspfuuset & hi üses erschtä Z‘morgä gmacht. Da mir no äs Leck ir Wasserleitig hii, het d‘Sandra no mit dr Campervermietig hin & här gschriibä & u no äs paar Tipps vom Vater überchoo. Da mir ds Leck nid säuber chü flickä het üs d‘Vermietig gluegt, ds mir de in Kelowna ih nä Wärkstatt chöii. Das üs vor Zyt häär nid bis am 4i id Wärkstatt glängt het, müessä mir de morn no mau d‘Strecki zrugg fahre…
Mir si när ds Hope los gfahre uf Merritt, dert hii mir für 2-3 Täg z‘Ässä iikuuft & si no fein ga z‘mittag ässä. När isch üsi Reis wiiter gangä bis Kelowna, dert hii mir müessä tankä. Üses Tagesziu isch Vernon. Dert hii mir dr Campingplatz Cedar Falls ah gstüüret & wärdä dert zwo Nächt verbringä.
Mir hii üs dert wiedr iigrichtet u si dert dür dä schön Camping glofä. Am Abä hii mir när no kochet & hii dr Abä im warmä Camper gnossä. (üses Z’nacht het chli lang bruucht im Ofä & drum hii mir Rächt spät gässä😅)Äs git ä früschi Nacht. Da mir am Morgä id Wärkstatt uf Kelowna müessä, si mir när de gli mau ga liigä.

Vancouver - Vernon 493 kmRead more

Da mir hüt e längeri Strecki mit diverse Zwüschestopps vor üs hei gha, simer früeh uf und am 7.15 in Banff losgfahre.
Zersch afa mau uf Lake Louise, wo mir no hei tanket und üses Propan wieder hei la uffülle. När isches de miteme voll motivierte Camper ufe Icefield Parkway gange. Ds isch dr Name vor Panoramastrass zwüsche Lake Louise und Jasper und Landschaftlech absolut eini vode schönste und beidruckendste. Es het ir Nacht no früsch gschneit u dür das si dBärge schön kitschig wiss gsi.

Dr erst Halt isch bim gfrorne Bow Lake gsi, womer churz si usgstiege u hei Föteli gmacht. Churz drufabe ischs witer zum Waterfowl Lake, wo d Ussicht e chli spektakulärer isch gsi. Dr Berg het sech nämlech wunderschön im halbgfrorne See gspieglet.

Dür die kurvigi Landschaft isches witers bis zum Columbia Icefield. Dert heimer e längere Haut gmacht u si zum Gletscher häre gloffe. Ufem Weg dert here hets verschiedeni Infotafele gha und Markierige, wo hei zeigt i welem Jahr dr Gletscher wo isch gsi. Vom Weg us gseht me vorauem dr Athabasca Gletscher, wo e Teil isch vom Columbia Icefield (ds isch es Isfeld wo us acht grosse Gletscher besteit). Dr Gletscher schmilzt pro Jahr um ca. 5 Meter. Nach dere chline Wanderig heimer im Touristecentrum vor Ort no gad öpis zMittag gässe u ner heimer gstärkt ume chönne witer fahre.

Am Namitag heimer spontan e Halt gmacht bide Sunwapta Falls, wo vom Parkplatz us sehr gäbig z erreiche si. Hie het me bereits ersti Azeiche gseh vom Waldbrand.
Letscht Summer het im Jasper Nationalpark e grosse Teil vom Wald und vom Ort selber brönnt (insgesamt öpe 32'722 Hektare) u vieles zerstört. Z Usmass vo dem Brand heimer ner ab dert ersch richtig mitübercho.
Ufem Weg vo de Sunwapta Falls simer nomau zwöine Orte aghalte zum d Ussicht aluege. Bestuunt heimer de meh aber die schwarze Stängle vom Waud, wo si übrigbliebe. Je nöcher mir a Jasper si cho, desto schlimmer isches worde, Mir si beidi während dere Fahrt sehr emotional worde u hei Träne müesse zruggbhalte. Sone Zerstörig vor Natur müesse z beobachte tuet im Herz weh. In Jasper acho simer no ines Kafi gange u hei ds afa mau müesse la sacke. Mir hei ke Wort für ds wo hie letscht Summer passiert isch u hoffe, dass sich d Natur möglichst gli vo dere Katastrophe cha erhole.Read more