E guete Abschluss

Nachdem mer gester zimlech kabutt si ga pfuse simer hüt erhout erwachet. Mit hei usgschlafe u dr Morge gmüetlech gnoh. Da mir beidi chli anders Programm hei gha, wird de dSandra da säuber no öpis derzue schribe.

Nachdem mer hei uscheckt gha bini mir dr Sandra es Stück mitgloffe u ner einisch ume Block. Mi erst Stopp isch de när es härzigs Kafi gsi in Kensington Market. Dert bini zwöi Stund ghöcklet u ha mitem Julian telefoniert.
När bini zrugg zum Hostel, wiu i ha dert mit dr Jen abgmacht. I ha Jen letscht Jahr in Costa Rica lehre kenne u si wohnt hie zToronto. Drum isch cool het ds mitem träffe klappet u mir hei huufe plöiderlet u zMittag gässe. Am 4i heimer üs de verabschiedet u mir hei üs ufe Weg a Flughafe gmacht.

Toronto het sich vo sire beste Site zeigt bim Abflug u mir hei e wunderschöne Sunneuntergang dörfe bestuune.

Ig ha mi när vor Michelle verabschiedet & bi när ca. 40 Minute z‘Fuess zum CN-Tower glofä.
Bim härä lufä isch no T-shirt Wätter gsii. Vorem Tower hets no auti Isäbahne gha. Für ufä Turm uechä, hani äs Ticket bruucht. Dussä hani öpä ä haub Stund im strömmendä Rägä müessä ahstah für näs Ticket. Nach däm ig ds Ticket ha gha, hani no mau ä Stund müessä wartä, bis ig ufä Tower ha chönä.
Mir si mit em nä Lift uf diä 1. Plattform bracht wordä. D‘Ussicht vo dert über diä ganzi Stadt isch überwäutigend gsi. Trotz Rägäwätter ha ig d‘Ussicht chönä gniessä. Diä langi Wartäzyt het säch glohnt gha. När isches mit em nächschtä Lift, no ä Etage wiiters gangä. Dert isch när dr Bodä & d‘Wand us Glas gsii. Vom Luft het dr Turm rächt gwagelet. Ig bi när zrugg uf diä 1.Etage & när wiedr dürä strömend Rägä zur Michelle & zur Jen glofä.Read more