Reset search
Süd- und Zentralamerika
  • Michelle Kiener

Süd- und Zentralamerika

Ab ines neus Abentür ufem ne neue Kontinent. I reise es paar Monet dür Südamerika. D Route isch no sehr offe u bi drum gspannt, wo das mi here zieht... Read more
+2
FollowInsightsCalendarShareShareBucket list
Newest first
  • Michelle KienerSüd- und ZentralamerikaTraveler
    Stoumuur Punta Negra
    1Dr Plan vom PabloScho zerste mau übere Steimuur klätteretDür die Schlucht simer ufe choVoila die HöhliUsrütsche wär hie e schlechti Idee

    Mir hei ä "wir schaffen das"-Mentalität

    May 29, 2024 in Argentina ⋅ ⛅ 17 °C

    Leider heimer Mendoza scho ume verlah richtig Norde. Üses nächste Ziel isch San Juan. Zersch simer zur Stoumuur Punta Negra gfahre u hei ame Ussichtspunkt ghaute. Da me dert iz nid mega viu het chönne mache simer witer a nächst See. Dert heimer uf Google Maps gseh, das es e Höhli git u hei gfunge, di sig sicher eifach z erreiche. Naiv u unvorbereitet simer dert ufem Parkplatz acho. Dr Pablo, sone Parkplatzwächter, het de afa mau am Julian sini Turnschueh gseh u gfunge, ds geit de gar nid u mini Trekkingschueh heter oke gfunge. Julian het de uf Wanderschueh gwächslet u i hami no mitem Pablo unterhaute u gseit, mir wette gern zu dene Höhline. Er het üs ufeme Papier dr Wäg dert here ufzeichnet u aus erklärt u de simer de loszottlet. Nach paar Meter isch Julian scho mau froh gsi, das er het uf Wanderschueh gwächslet, wiu e feste Weg hets nid würklech gäh. Mir hei probiert dere Charte vom Pablo folge (er het üs sogar no sis Nummero ufgschribe, faus mer würde verlore gah). Nacheme Zitli simer zure Schlucht cho u gemäss Charte müesste mer dert düre. Chli skeptisch simer de mau dert düre gloffe u gmerkt, dases recht steil wird. Mir hei am Pablo vertrout u huufe Muet brucht, aber si belohnt worde mitere hammer Ussicht. Obe isch de es Schild gsi, wo die "Cuevas" si agschribe gsi. Dert abe loufe isch oh sehr abentürlich gsi u i has chli bereut, hani nid oh uf Wanderschueh gwächslet gha. Es isch teilwis sehr rütschig gsi u steil abe gange nebedran. Julian het mi de motiviert, idem er immer wider gseit het:"momou ds geit, mir hei iz e wir schaffen das mentalität". Mir hei uf jedefau die Höhli gfunde u si ner ume zrugg dr glich Wäg. Ds ufechlättere u konzentriere het mi doch de chli brucht. Hät üs dr Pablo die Charte nid zeichnet, wäre mer sicher nie dert düre gloffe u d Höhline hätte mer scho gar nid gfunde. Es isch aber echt schön gsi u het sech glohnt. Zrugg ufem Parkplatz heimer am Pablo danket u ihm paar Schwizer Münze gäh, wiu er drna gfragt het. Er het mega freud gha u mir si zfride uf San Juan id Stadt gfahre u hei dr Abe la usklinge.Read more

    See translation
  • Michelle KienerSüd- und ZentralamerikaTraveler
    Morgestimmig
    Talampaya NationalparkMit däm Bus simer düre Park chauffiert wordeGuanakosLandschaft unterwegs

    Talampaya Nationalpark

    May 31, 2024 in Argentina ⋅ ☀️ 21 °C

    Hüt morge simer ume mau früeh uf für i Nationalpark Talampaya. Dert heimer e Tour buechet am morge am 9ni, wo üs ner 2,5h het düre Park gfüehrt. D Tour isch zwar uf spanisch gsi u mir hei nid aus verstande, aber dr Guide het sich mega müeh gäh, woni aube nomau ha nachgefragt. Dr Talampaya isch e Canyon, wo mega spannendi Formatione het u Schlucht isch öpe 150m höch. Me het dert huufe Spure vode Vorfahre gfunde u oh vo Dinos. Im Park heimer oh wiudi Tier gseh, nämlech Capybaras und Guanakos (ds isch e Art Lama, aber in freier Wildbahn). Mega faszinierend gsi dä Vormittag u es het sech glohnt, so früeh ufzstah.
    Am Nami simer när witergfahre uf Belen. Mir hei mega schöni u spannendi Landschafte gseh u immer wieder mau aghaute zum luege u chli umeloufe.    Read more

    See translation
  • Michelle KienerSüd- und ZentralamerikaTraveler
    Blick über Belen
    Garte im HostelÜses IgluDert wos Empanadas git1Happy faces mit Empanadas2Salta

    Hola Salta

    Jun 1–2, 2024 in Argentina ⋅ ☀️ 27 °C

    Gester heimer nid sehr viu gmacht. Z Belen simer am Morge no hurti zume Ussichtspunkt gloffe u hei über d Stadt gseh. Ner si mer vo Belen uf Cafayate gfahre u si mau scho am Nami im Hostel acho. Mir hei i somne Iglu übernachtet. Da z Wätter so schön isch gsi u dr Garte im Hostel mega gmüetlech, heimer dr Nami dert verbracht mit läse, Tagebuech schribe u hei telefoniere. Es het mega guet tah, d Seele chli cha bambele. 😊

    Hüt simer nachem zmorge witergfahre uf Salta. Underwegs hets mega viel z gseh gäh u mir hei regelmässig e Stopp igleit zum Landschaft aluege u üs chli bewege. Gäge Mittag heimer bim ne Huus aghaute wos schins super gueti Empanadas git. Uf Google hets e Bewärtig vo 5* gha, drum heimer denkt, ds probiere mer mau. Mir si dert ine u es het sehr eifach usgseh. Si hei de aber d Empanadas früsch gmacht u nach paar Minute warte heimer e super Mittagssnack gha u mega geili Empanadas.
    Iz simer in Salta acho. Ds isch letscht Stopp in Argentinie. Mir plane iz no üsi nächste zwei Tag hie u ner am Mittwuch fahre mer de witer uf Chile. 😁    Read more

    See translation
  • Michelle KienerSüd- und ZentralamerikaTraveler

    Hasta la próxima Argentina

    Jun 3–4, 2024 in Argentina ⋅ ☁️ 14 °C

    Da z Wetter in Salta nid so guet het gmäudet, heimer nid viu planet u huufe erlediget. Ds het sehr guet tah, mau nid so viu z mache.

    Gester heimer usgschlafe, brunchet (mir hei so öpis wine Züpfe gfunde 😁) u ner simer id Stadt. Es isch nid so üse Tag gsi irgendwie... Bim Auto vor us heimer afa mau müesse Parkgebühre zahle u i bi sicher, di Dame het üs dert abzockt. Ner simer ga Wösch bringe u si mega erchlüpft abem Pris, er isch nämlech knapp dopplet so höch wi in BA und Mendoza. Witer simer zur Busstation üses Billet ga choufe für uf Chile. Dert simer nachem Pass gfragt worde u natürlich hei mir dä nid derbi gha. Es het aber de glich klappet, wiu mer no Fotos hei gha u üsi Passnummere gwüsst hei (immerhin öpis). När simer ines Ichoufszentrum ga Socke, Zahnbürstli u Zahnpasta choufe, wiu Mann löcher het resp. z Züg in Cafayate het la liege. Nachdem simer no dür z Zentrum spaziert u hei es Piercing für mi kouft, wiu i mis verlore ha. Z Zentrum vo Salta isch mega herzig u sehr belebt. Dr abe heimer de daheime gnosse mit Choche und Serie luege.

    Hüt simer no mitem Gondeli ufe Cerro San Bernardo u ner vo dert abe gloffe. Leider isch oh hüt durchzoge gsi u d Sicht nid mega guet. Isch aber glich schön gsi. Daheime heimer zMittag gässe u ner simer üses Auto ga zrugg bringe u ga ichoufe. Iz heimer packt für morn, si fein ga zNacht esse u ga liege. Morn morge am 6i fahrt de üse Bus uf San Pedro de Atacama in Chile.
    Mir verlöh Argentinie leider scho, es isch es wunderschöns Land mit sehr abwechsligsriche Landschafte u ungloublech fründleche Mönsche u würklech mega feinem esse. I chume gwüss de paar Kilo schwärer hei. Mir si sicher nid zletschte mau da gsi, drum: hasta la próxima 👋🇦🇷    Read more

    See translation
  • Michelle KienerSüd- und ZentralamerikaTraveler
    Ussicht ufe VulkanDa het er no glachet

    Es Velotüürli ir Wüesti

    June 6, 2024 in Chile ⋅ ☀️ 23 °C

    Gester simer dr ganz Tag mitem Bus vo Salta nach San Pedro de Atacama gfahre. Dert acho simer mega kabutt gsi u hei chopfweh gha. Cha si das mer d Höchi chli merke (si übere Pass gfahre wo uf über 4'000 m liegt) u drum simer när oh früeh ga liege.

    Hüt heimer bim zmorge e Schwizerin troffe. Isch zerste mau innerhalb vo 1, 5 Monet. När heimer für hüt Bikes gmietet u si dermit chli us San Pedro de Atacama usegfahre. Mir si hie ir trockenste und höchste Wüesti vor Wäut u ds merkt me oh. Velofahre isch huere asträngend gsi u me söt gnue Wasser drbi ha. D Höchi isch echt nid z unterschetzä.

    Üses Ziel isch dr Gargante del Diablo gsi u da muess me vorher no Itritt zahle. Dert bir Kasse heimer dr nächst Schwizer troffe, er isch z Fuess unterwegs gsi, aber mir hei ne immer wider gseh unterwegs. Mir si auso de dür sone Schlucht gfahre mit de Bikes, hei immer mau wieder Stopps igleit, wiu es het eim scho brucht. Dr letscht Teil geit so ufne Berg ufe u dä muess me no zFuess gah. Läck hani gschnuufet dert ufe. D Ussicht isch aber dr wahnsinn gsi 😍 Tolli Felsformatione u me het no e Vulkan gseh wo fasch 6'000m höch isch. Ufem Gipfel heimer nid nume dr Schwizer, sondern oh no e Italiener u Engländerinne troffe. Mir hei üs dobe no mit aune unterhalte u lang pöiselet. Z Zrüggfahre mit de Bikes het mega gfägt, das liecht abwärts isch gange u so simer oh schnell us dr Schlucht dus gsi. Bevor mer dr letscht Teil hei chönne i Agriff näh het Julian e Platte gha u mir hei müesse dr Schluch wächsle am Redli. Irgendwie isch ds nid so guet gange, mir heis nid chönne ufpumpe u drum heimer när müesse ar Vermietig alüte. Si hei de es neus Velo bracht u mir hei chönne id Stadt zrugg fahre.
    Es isch mega spannend ire Wüestestadt zsi, hie isch aktuell Winter u düre Tag sis immerno öpe gäbigi 23 Grad. Ir Nacht wirds scho extrem chaut. Mir hei e gueti Reisezit verwütscht, wius oh weniger Mönsche het u nid so brätschheiss isch. Morn heimer e Tagestour plant u mir si mega gspannt druf.    Read more

    See translation
  • Michelle KienerSüd- und ZentralamerikaTraveler
    Morgestimmig bim Tropic of Capricorn
    VicuñasBide Piedras RojasZMittagFlamingos

    Reserva Nacional Los Flamencos

    June 7, 2024 in Chile ⋅ ☀️ 13 °C

    Sit mer in Chile si het sech üse Tagesrhytmus komplett gänderet. Mir si am 6i am Morge abghout worde für ne Tagestour.
    Nachdem die ganzi Gruppe isch ufgsammlet gsi simer zum Tropico de Capricornio gfahre. Ds isch e Ussichtspunkt u zudem isch dert no e Teil vom aute Inkatrail zgseh. Dert hets de afa mau zMorge gäh mit Rüehrei, Guacamole, Fleisch u Chäsplättli, Gonfi, Dulce de Leche, Nutella u Frücht. Mir si mega überrascht gsi, dases so viu git. Gstärkt simer witer zu zwöine Lagune gfahre. Die liege am ne Fuess vom Vulkan Miñiques u si wunderschön gsi. Mir hei dert zwe Flamingos gseh, Vicuñas (e wildi Art vo Alpakas) und Vögu. Ungerwegs heimer no meh Tierli gseh: so e Art Struss, Füchs u Guanakos. Nach dene Lagune isches witer gange zu de Piedras Rojas, die heisse so wiu - guess what - d Steine dert rot si. Es isch e mega idrücklechi Landschaft dert u si gseht so us ufgrund vo Vulkansteine. Mir hei uf dere Tour mega viu über d Geologie u d Flora und Fauna glehrt. Nach de Piedras Rojas hets zimlech hunger gäh u de simer no es Stück gfahre u dert hets de zMittag gäh. E Salat useme Weckglas. Mir si einisch meh begeisteret gsi vom Esse wos uf sore Tour git. Am Nami simer no zure Flamingo Lagune gfahre. Dert läbe drü Arte vo Flamingos. Die Tier si für d Iwohner vor Atacamawüesti sehr wichtig, da si sit immer scho dert si. Mega cool gsi, die Tier dörfe ir freie Wildbahn erlebe.
    Nachdem simer zrugg uf San Pedro de Atacama gfahre, si dür d Lädeli gschlenderet u ga ZNacht esse. Morn heissts de scho ume früeh Tagwach u es geit richtig Bolivie.    Read more

    See translation
  • Michelle KienerSüd- und ZentralamerikaTraveler
    Laguna Blanca
    Sol de MañanaLaguna ColoradaLamas miteme Baby Flamingo

    E witere Stämpu im Pass

    June 8, 2024 in Bolivia ⋅ 🌬 8 °C

    Dä Morge simer ume früeh abghout worde u dr Fahrer het üs zur bolivianische Grenze bracht u dr Grenzübertritt begleitet. Es isch aues bestens organisiert gsi u er het üs de am Alfredo übergäh. Ds isch üse Driverguide für drü Tag. Scho simer z Bolivie u dr Alfredo fahrt üs iz mitem Jeep desume hie.
    Zersch simer zu de Lagune Verde u Blanco gfahre, gad ännet dr Grenze. Dr Alfredo weiss mega viu drüber z verzeue. Hie hets huufe Lagune, wo aui dür Vulkän si entstande. Bi so warme Quellene heimer de z Mittag gässe. När simer zum ne aktive Vulkan, am Sol de Mañana, u dert hets bloderet u grouchnet usem Bode. Witer simer zur Laguna Colorada, wos mega viu Flamingos het gha u oh Lamas u Vicuñas. D Landschaft änderet sech hie mega schnell u isch sehr idrücklech. Da mir im Winter si hets chum Touriste u mir si quasi allei. Mir si oh nume dritt mitem Guide, obwou mir nid e privati Tour hei buechet. Üses Hotel isch de mitz ire Wüesti gsi uf 4'800 m ü M. Da dert nüt anders drum isch, simer nachem znacht no use u hei dä wunderschön Sternehimmu beobachtet u sogar d Milchstrass gseh. Mir hei d Höchi guet möge merke, emu gad bim schnufe. Dr Tag isch sehr läng gsi u mir hei viu neui Idrück gsammlet. Drum simer de oh bezite iz Bett.    Read more

    See translation
  • Michelle KienerSüd- und ZentralamerikaTraveler
    So nah chunnt me süsch schins nid a Flamingos
    1San Pedro de QuemesSaaaalzUfem Weg ufd InsleDa hani no glachetDs wisse isch aues Salz

    E Salzsee u stechendi Kakteen

    June 9, 2024 in Bolivia ⋅ ☁️ 14 °C

    Nachem z Morge simer wider paar Höhemeter töifer gfahre. Mir hei viu Zit im Jeep verbracht.
    Zersch heimer nomau bire Lagune aghaute mit Flamingos u ner simer witergfahre uf San Pedro de Quemes. Ds heisst so, wiu ds Dorf mau abbrönnt isch. Quemes heisst nämlech so viu wie "verbrönnt". Dert heimer es super zMittag übercho u ner heimer no die Ruine vom alte Dorf chönne ga aluege. Er het üs hüt oh viu über d Völker verzeut wo dert wohne, d Aymara. Ds isch recht es grosses u starks Volk. Üse Guide stammt übrigens vo de Chuechua ab. Es witers Volk wo aber eher südlicher vertrette isch. Die Völker si schono speziell, wiu jedes het ihri eigeti Kultur u Sprach u es git se immer no.

    Am Namitag simer de när i Norde vom Salar de Uyuni gfahre. Ds isch dr grösst Salzsee vor Welt. Im Moment isches troche u drum hets oh ds Wabemuster din. Mir hei de no bire Insle aghaute u er isch mit üs dert ufe gloffe. D Ussicht isch mega gsi u het chli usgseh, aus würd me uf nes Nebelmeer luege. Bim Abstieg bini flott usgrütscht u natürlech ine Kaktus gheit mit dr Hand. Tuet auso weh u isch nid empfählenswert. I has de am Alfredo zeigt u dä het mer no Stachle us dr Hand zoge, eine isch öpe 8mm läng gsi u i bi froh isch dä duss.

    Übernachte tüe mer hüt imne Hotel, wo us Salz bout isch - Ja i has abgschleckt u testet 😂    Read more

    See translation
  • Michelle KienerSüd- und ZentralamerikaTraveler
    Aymara Museum
    Da heisi denn gläbt u Mumie gfunde1Salar de UyuniIncahuasiPicknick ufem SeeIm SalzhotelÜses zNacht

    Touri in Salar de Uyuni

    June 10, 2024 in Bolivia ⋅ ⛅ 13 °C

    Dä Morge heimer bitz länger chönne schlafe. Dr Alfredo het üs pünktlich am 9.00 abghout. Mir si uf Coqueza gfahre, wos es Museum het über d Aymara. När simer witer am Vulkan Tunupa ufegfahre. Dert obe heisi Mumie gfunde, wome ire Höhli cha ga aluege u zudem gseht me, wie d Lüt dennzumau glöbt hei. Ds isch intressant u oh chli gruselig gsi.
    Nachdem simer de witer i Salar de Uyuni gfahre u d Witi vo dem Salzsee isch ächt immens. Miz drin heimer de ghaute u die bekannte Touribiudli gmacht. Üse Guide het volle Isatz gäh bim Fötele.
    När simer witer ufd Insle "Incahuasi". Di isch mitz im See u me het e fantastische 360 Grad Usblick. Dert het er üs de allei la umeloufe. D Insle het tusigi vo Kakteen u si wird vo Iwohner vo Tahua unterhaute. D Itritte wome dert zaut chöme übrigens aui ade Iwohner zguet. Dr Tourismus isch für si sehr wichtig.
    ZMittag hets es Picknick gäh, wo dr Alfredo het vorbereitet. Es het Quinoa mit Gmües u Lamafleisch gäh. Ds esse dLüt i dere Region vo de Ande oft, da Quinoa dert about wird u si natürlich oh huufe Lamas hei.
    Nachem Mittag heimer no es Salzhotel bsuecht. Es isch zerste Hotel komplett us Salz wo oh uf Salz isch bout worde. Es wird allerdings nüm aus Hotel brucht, sondern nume no aus Museum. Ds isch oh dr letscht haut gsi im Salzsee u mir si zrugg gfahre uf Uyuni. Dert simer zerste mau sit mer z Bolivie si ire Stadt gsi u me merkt gad extrem, das Bolivie z ärmeste Land in Südamerika isch. Mir hei es Busbillet kouft für uf Potosì u si när ga znacht esse. I ha nid mega hunger gha u drum Api bsteut. Es isch unger de typische bolivianische Spise gstande u ha denkt i probieres mau. Api isch es Heissgetränk us Mais, Zimt, Nägeli, Zucker u Zitroneschale. Mega süess, aber fein u es het mi a Wiehnachte erinneret. Derzue hets e Empanada gäh mit Chäs din. Dr Teig vor Empanada isch aber oh liecht süess gsi u es het Puderzucker druf gha. Spezieu, aber oh ds isch super gsi. Ha zwar nid miteme süesse znacht grächnet, aber isch tiptop gsi.    Read more

    See translation
  • Michelle KienerSüd- und ZentralamerikaTraveler
    So gseh Busse us ir StadtPotosì bi Nacht

    Potosì - ke Liebi ufe erst Blick

    June 11, 2024 in Bolivia ⋅ ☀️ 17 °C

    Ab iz simer wider ohni Guide unterwegs. Mir si gad drü Tag ire mega Touristebubble gsi, ohni Mönsche u Städt u mit viel Natur. Ds heimer hüt chli z gspüre becho.
    Am Morge heimer dr Bus vo Uyuni uf Potosì gnoh. Die Fahrt het guet 4h duuret, aber es het kes WC im Bus gha u oh nie e WC Pouse gäh. Dementsprächend simer z Potosì aus ersts ga es WC ufsueche. Abgseh vor voue Blase ischs recht e gäbigi Busfahrt gsi. In Potosì simer när leider bim andere Busterminal acho aus mir gmeint hei u so isch üses Hotel rächt wit wäg gsi. Ds het üs gad chli gnervt u mir hei de es Taxi gno, wo üs garantiert zviel het verlangt, aber iz... Nachem ichecke simer zersch zum andere Busterminal, wo neb üsem Hotel isch u hei Tickets kouft für uf Sucre. Da mer no nüt ussert zmorge hei gässe simer när ufd Suechi nachem Mittagesse. Gar nid so eifach gsi, das dert weni Restaurants het u vorauem si aui zue gsi. Mir hei imne Kiosk afa drü Chäsbrötli kouft u ufs zNacht ghofft. Näbem Hotel hets schliesslech gad gäbig e Pizzalade. Mir hei ar Rezeption äxtra gfragt, wenn dä uftuet u si när um die Zit los. Aber ja, dä Pizzalade isch zue gsi. Si vor Rezeption het üs de no Restaurants ir Stadt empfohle. Mir hei nüm würklech Energie gha u es het üs nid so gfaue dert, da dr Ort mega stoubig isch, s viel Abgas het u huufe Küder umeliegt. Dr Kulturschock isch doch gad chli gross gsi a dem Tag. Trotzdem hei mer üs e Ruck gäh u hei de e Bus id Stadt gnoh. Dr chli Bus isch guet 45 min unterwegs gsi, da Potosì mega hügelig isch. D Tür vom Bus isch immer offe u so öpis wie Haltestelle gits gloub nid, me rüeft eifach weme use wot. Ir Alstadt hets üs doch de no afa gfaue u mir hei ime Pub es feins ZNacht übercho. Hei simer oh ume mitem Bus. Es isch so spannend gsi di Iheimische z beobachte u dä Abe het richtig guet tah. Mir verlöh Potosì so definitiv miteme bessere Idruck.Read more

    See translation
  • Michelle KienerSüd- und ZentralamerikaTraveler
    Über de DächerHallo PlatzangstGmüesmärit

    Über de Dächer vo Sucre

    June 12, 2024 in Bolivia ⋅ ☀️ 23 °C

    Scho am Morge isch üse Bus gange uf Sucre. Ds isch d Houptstadt vo Bolivie. Oh hüt simer ume 4h im Bus gsi, dismau simer aber besser vorbereitet gsi bezüglich Blase.
    Dr Buschauffeur het üs de ir nechi vom Zentrum useglah u mir hei zu üsem Airbnb chönne loufe. Da mir no gad nid hei ine chönne simer zersch bim Mexikaner ume egge ga zMittag esse. Nachdem mer de üses Gepäck hei chönne is Airbnb tue simer id Altstadt gloffe. Sucre het definitiv meh Charme aus Potosì u gfaut üs mega guet. Mir si chli umegschlenderet u bir ältiste Katedrale heimer de e chlini Füehrig ufs Dach gmacht. Bi vielne Chiuche chame hie ufe Turm u so het me e cooli Ussicht ufd Stadt. Mir hei de oh no bitz öpis über d Katedrale erfahre u d Ussicht natürlich gnosse. Bim Märit ir Stadt simer no ga Gmües choufe für zNacht u wius üs so guet gfaut, heimer no gad e Nacht meh buechet. Sucre het viel spannendes zbiete u es steckt viel Gschicht dinne, womer gern no wette erkunde.Read more

    See translation
  • Michelle KienerSüd- und ZentralamerikaTraveler
    Casa de la Libertad
    Im SchoggimuseumMuseum für indigeni Kunst

    Schoggi u auti Traditione

    Jun 13–14, 2024 in Bolivia ⋅ ☀️ 24 °C

    Gester morge simer zersch iz Casa de la libertad. Dert isch d Unabhängigkeit vo Bolivie bestumme worde u drum e wichtige Ort. Leider bini vom Bsuech recht enttüscht gsi. Mir hei üs are Tour agschlosse, wo scho het gstartet gha u die Dame het sehr schnell u monoton spanisch gredt. Da mer nid vo afang ah si derbi gsi hani ke ahnig gha, vo was si redt. Süsch Infos uf Englisch hets leider oh nid gha. Mir hei de paar Biuder agluegt u si ner no huufe ga google. Z Huus säuber isch süsch mega schön u pflegt.
    Am Nami heimer no iz Schoggimuseum wöue, wiu si säge dert, dass es die besti Schoggi weltwit isch. Z Museum isch am Nami zue u drum simer eifach e Schoggiglace ga ha, no ufe Märit üses zNacht ga choufe u hei e gmüetleche abe daheime gmacht.

    Hüt morge heimers nomau wöue wüsse mitem Schoggimuseum. Mir hei e Tour chönne mache, wo si eim hei erklärt, wo Schoggi herchunnt u wi si hergstellt wird. Isch für mi nid würk öpis neus gsi. När heimer no drü Sache dörfe probiere. Z coole isch, dass si ihri Produkt nume vo Bolivie bezieh. Im Shop heimer de Schoggi kouft, wos ir Schwiz nid git. Eini mit Quinoa u eini mit Coca.

    Am Nami simer no im Museum für indigeni Kunst gsi. Dert zeige si Webkunst, Musig u Tänz vo de drüne indigene Völker. Z Ziel vo dem Museum resp. dere Stiftig isches, die Traditione witer chönne z erhalte. Es isch sehr spannend gsi. Mir hei Infos sogar uf Dütsch übercho. Es het sehr viu z läse gäh u me het huufe erfahre. Die Webarbeite si mega idrücklech gsi u i verstah iz, wiso ds aus Kunst agluegt wird. Si repräsentiere immer aktuelli Gschehniss u es steckt oh viel spirituells drhinger. Dä Bsuech het sich uf jedefau glohnt.
    Morn isch üse letscht Tag in Sucre u mir wärde am Abe de zerste mau e Nachtbus näh.    Read more

    See translation
  • Michelle KienerSüd- und ZentralamerikaTraveler
    De Dino uf dr Spur
    DinospureCochabambaUssicht vom Dach

    Vo Dinospure u ungmüetleche Nachtbusse

    Jun 15–16, 2024 in Bolivia ⋅ ☁️ 25 °C

    Gester heimer üs es tolls letschts zmorge gönnt in Sucre u när simer mitem Dinobus i Parque Cretàcico. Dert heisi Spure vo Dinosaurier gfunde ade Wänd. Wiso ade Wänd? Annodazumal wo Dinos gläbt hei, isch dert aus flach gsi und Meer. När hei sech die beide tektonische Platte zu de Ande bildet u drum isches mittlerwile senkrecht. Si hei die Spure per Zuefau entdeckt, wosi dert es Zementwerk hei afa boue. Mir hei üs are chline Tour agschlosse u so erfahre, zu welne Dinos die Spure ghöre. Am Nami simer no ga käffele u zNachtesse bevors ufe Nachtbus isch.

    Dr Bus isch eigentlech no bequem gsi u d Sitze recht breit. Leider hets dr Chauffeur um die viele Kurve um sehr pressant gha u d Fahrt isch würk unagnähm gsi. I ha süsch kes Problem mit so Strasse, aber da isch sogar mir komisch worde.
    Mir si dür das oh scho am 3.30 ir Nacht z Cochabamba acho. Da mir nid i dem dubiose Terminal stundelang hei wöue usharre, simer spontan bim Hotel nebedran ga frage, obs no es Zimmer frei het. Dür das heimer immerhin nomau paar Stündli chönne schlafe. Mir heis am Morge gmüetlech gnoh bevor mer i üsi anderi Unterkunft hei chönne ichecke. Am Nami simer de nüm gross furt, wiu beidi chli Problem mitem Magedarmtrakt hei gha u mir hei üs usgrueiht. I bi de no hurti vo Huus zum Wasser u Cola hole u hamers nid la näh, no ufs Dach ufe zgah. Dert het me nämlech e gueti Ussicht über d Stadt. Mir tüe de morn Cochabamba no chli erkunde u si gspannt uf die grossi Stadt.    Read more

    See translation
  • Michelle KienerSüd- und ZentralamerikaTraveler
    La Cancha
    Houptplatz CochabambaUnterwegs vo Cochabamba nach La PazVerkehrschaos in La Paz

    Cochabamba nach La Paz

    Jun 17–18, 2024 in Bolivia ⋅ ☀️ 17 °C

    Mir hei no e ganze Tag Zit gha in Cochabamba u drum simer am Morge los richtig La Cancha. Ds isch dr grösst Märit vo Südamerika säge si. Er isch teilwis dus u teilwis ire grosse Halle. Mir si eifach mau chli dür z Züg gloffe u hei gstuunet, was es dert aus git - grundsätzlich gits je e Stand für aus: Frücht, Gmües, Chleider, Hüet, Teigware, Ris, Süessigkeite, WC Papier, Chrüter, Zahnpasta, Socke u vieles meh. Was üs beidi aber am meiste schockiert het si Chuehschnurre gsi mit no bitzi Fell dran u nebedran gad Chuehbei mit de Chlaue. Mi hets fasch glüpft dert. Dr ganz Märit isch so riesig mit verschiedene Grüch u vielne Mönsche, das mer e zimlechi Reizüberfluetig hei gha. Am Julian ischs de ner oh wider chli schlechter gange u drum simer ume zrugg id Wohnig. I bi de am Nami nomau loszoge ufe Houptplatz u ha no paar Sache kouft.

    Hüt morge simer früeh uf u hei dr Bus gnoh uf La Paz. Ds isch die höchstglägeni Verwaltigshouptstadt. Hie simer iz 6 Tag u mir werde sicher d Stadt erkunde u oh süsch no paar Üsflüg ir Region mache.    Read more

    See translation
  • Michelle KienerSüd- und ZentralamerikaTraveler
    Blick über d Stadt
    Ab ufe TurmMitem Gondeli bisch schnäuer aus mitem OutoSnack ime alte Wagon2

    E Gondelitour dür d Stadt

    June 19, 2024 in Bolivia ⋅ ☁️ 16 °C

    Dr best Wäg e erste Idruck vo La Paz z übercho, isch e Seilbahntour z mache. Si hei hie z grösste urbane Seilbahnnetz weltwit u ds macht i dere Stadt oh Sinn. Mir si eifach mau zur nöchste Station, hei dert es Chärtli kouft u mit Guethabe ufglade u so simer när quasi einisch rund um d Stadt gondelet. Ds Netz verbindet die beide Städt La Paz und El Alto. Scho krass wi sech d Stadt je nach Linie verändert. Es het wie bire U-Bahn verschiedeni Linie in Farbe. D Gondelstatione und Gondeli hei de jewils die Farb.
    Zwöine Orte simer us dr Station use. Z erste mau bim Faro Morillo, sone Ussichtsturm wome cha ufeloufe u wo me über die ganzi Stadt gseht. La Paz und El Alto zeme si eifach riesig. I ha mi immer gfragt, wie d Mönsche denn uf die Idee si cho, i somne bergige u unebene Ort e Stadt häre z boue.
    Z zwöite mau simer use bim alte Bahnhof. Dert heimer Kaffee, Sandwich und Kuchen gha im ne alte Bahnwage. Z Isebahnnetz gits hie scho länger nüm, aber si hei dr Bahnhof la stah u oh no auti Bahnwäge. Dert chame derfür iz käffele.
    Zrugg i üsem Quartier simer no ufe Märit ga Frücht u Gmües hole. Mir si mega fasziniert gsi vo dene Seilbahne u wie super ds Netz hie funktioniert.    Read more

    See translation
  • Michelle KienerSüd- und ZentralamerikaTraveler
    2Zmooorge
    HexemäritFarbigi Souvenir Lädeli

    Hexemärit und Coca-Museum

    June 20, 2024 in Bolivia ⋅ ☁️ 16 °C

    Dä Morge simer ids Cafe del Mundo ga zMörgele. Ds isch gad ir nechi vom Mercado de las brujas (=Hexemärit). Mir si natürlech dert no dür Gässli spaziert und oh über dä Märit. D Gässli si mega farbig gstautet u bim Hexemärit chame huufe gheimnisvoui Sache choufe. Zum Bispiu e Fötus vom ne Lama, wo aus Dank ad Muetter Erde söu gelte. Isch mega intressant gsi. Zudem hani no paar Souvenirs gshoppet dert, auso nid ufem Hexemärit, sondern ide Lädeli nebedran.

    Zrugg ir Wohnig hani no mit mine liebe Fründe daheime u in Kanada telefoniert 🫶

    Am Nami simer de no iz Coca-Museum gange. Es het ume huuufe z läse gäh, aber me het mega viel Infos übercho über Coca Pflanze u d Bedütig wosi het für die indigene Völker. Coca Pflanze isch recht gsund u viel Iheimischi chätsche uf dere ume. Natürlech isch oh z Kokain zimlech thematisiert worde u was es für Uswürkige het im Körper u uf dr Welt. Es het eim chli d Ouge göffnet u mir hei viu glehrt.    Read more

    See translation
  • Michelle KienerSüd- und ZentralamerikaTraveler
    1

    Death Road Survivors

    June 21, 2024 in Bolivia ⋅ ☁️ 19 °C

    Hüt isch chli Action agseit gsi. Mir hei e Biketour buechet für uf Death Road (oder oh N Yungas Road). Die Strass isch mega schmal und füehrt ame Berg entlang. Bis 2006 isch ds d Houptverkehrsachse gsi zwüsche La Paz und em bolivianische Dschungel. Es het zwar nume knapp für eis Outo Platz, trotzdem heisi dert aube krützt u Bikes si de aube oh no abe. Mittlerwile gits e neui Strass füre Verkehr, aber natürlich chas immer no si das Outos die auti Strass abefahre. Da me dert here mega viel Biketoure cha bueche, hets huufe Biker:inne und d Vans vode Toure wo dert düre fahre.

    Dr Start isch uf 4'670 m obe u arschchaut gsi. Dr erst Teil isch no asphaltiert gsi (ca. 20km lang) bevors när uf die richtigi Death Road isch gange. Mir si mitem Guide, em Julio, und zwöine Engländer unterwegs gsi. Dr grösst Teil het er üs frei la fahre, was mega gfägt het. Julian u i si de aube vorus donneret u ab und zue heimer gwartet u d Ussicht gnosse. Vom Start bis Endi geit die Strass öpe 30km. Z Ziel isch de uf ca. 1'200 m u während dr Fahrt gseht me sehr guet, wie sich d Landschaft und oh z Klima veränderet. Mir si nämlech dert när afangs Amazonas gsi. Heisst, am Start heimer extrem chaut gha u när ischs immer heisser worde. Guet heimer am Endi vor Tour no ine Pool dörfe hüpfe.

    Es isch e megacoole actionriiche Tag gsi u mir si froh, heimer die gefährlichsti Strass vor Welt überwunde.

    Übrigens: dr Julio (üse Guide) het oh no Fotos u Videos gmacht. Di heimer aber no nid übercho.    Read more

    See translation
  • Michelle KienerSüd- und ZentralamerikaTraveler
    Plaza Morillo
    Killi KilliMärit ir Stadt

    Gmüetlechi Täg in La Paz

    Jun 22–23, 2024 in Bolivia ⋅ ☀️ 18 °C

    Nacheme Biketag heimer afa mau chli öpis gmüetlechers brucht u hei drum dr Tag wieder ir Stadt verbracht. Mir si no ga es Busticket choufe u när zum Plaza Morillo spaziert. Vo dert simer witer ufe Killi Killi, ds isch e Ussichtspunkt ir Stadt. Vo dert het me oh wider e super Ussicht gha, da z Wetter sehr sunnig isch gsi. Nacheme feine zMittag simer übere Märit u hei no paar Sache kouft. Dr Abe heimer bim Billiardspile verbracht.

    Am Sunnti heimer nid würklech Plän gha. D Mission isch gsi, irgendwo Haarshampoo u Snacks uftriebe. Mir si zume Ichoufszentrum gange. Dert si allerdings d Stöck 5-9 no im Bou. Ufem 11. Stock gits aber scho e Turnhalle. Mir si dert bitz umegirrt bis mer hei igseh, das dert nüt z hole isch u d Läde zue si. Nach guet zwöi Wuche Bolivie wird öpe oh üs langsam klar, das Supermärkt nid funktioniere u me eifach aus, würklech aus, ufem Märit ar Strass hout.
    Dr Nami heimer am Fuessball gwidmet. Mir si ime Irish Pub ga z Spiel Schwiz - Dütschland luege. Dr Bsitzer isch absolute Fuessballfan u git dert allne e Shot us, we ihri Mannschaft gwinnt. Mir hei trotz unentschiede oh eine übercho.
    Gad churz drufab simer ines English Pub ga zNacht esse. Dert isch z Spiel USA - Bolivie gloffe. Im Moment isch nämlech oh Copa America u da sie hie so Fuessballbegeisteret si, heimer oh nes Spiel vode Bolivianer wöue gseh. Bolivie het zwar verlore, aber me merkt, das hie oh huufe Emotione derbi si bim Schutte luege.
    Morn gömer witer zu üsem letschte Ort in Bolivie a Titicacasee.    Read more

    See translation
  • Michelle KienerSüd- und ZentralamerikaTraveler
    San Pablo de Tiquina
    D Fähre vom BusÜses BöötliCopacabanaD BasilikaUssicht vom Cerro CalvarioAm Strand

    Copacabana (nei nid in Rio de Janeiro)

    Jun 24–25, 2024 in Bolivia ⋅ ☀️ 13 °C

    Mir hei üs ufe Wäg gmacht nach Copacabana u ds isch oh bereits dr letscht Ort in Bolivie. Copacabana isch am Titicacasee u dHärefahrt isch scho recht cool gsi. Mitem Bus fahrt me bis San Pablo de Tiquina. Dert muess me när es Billet fürd Fähre choufe, wius no ke Strass dert übere git. Mir Fahrgäst si miteme Bootli überebracht worde u dr Bus het e eigeti Fähre gnoh. Isch recht spannend gsi zum zueluege. D Fahrt isch oh landschaftlich sehr schön. Dert acho simer no e chli düre Ort spaziert, wo sehr touristisch isch.

    Am Tag druf heimer guet zmörgelet (Nutellabrötli 😍) u ner simer ufe Husberg gloffe, dr Cerro Calvario. Mir stuune immer no, wie sehr mir schnufe vo es bitzi ufe loufe. D Höchi zwingt eim immer wieder, aus chli langsamer la agah. Vom Cerro Calvario het me e fantastische Usblick uf Copacabana und em Titicacasee.
    Nachem Abstieg simer no a Strand u dert ufnes Bänkli ghöcklet. Me merkt oh hie das Winter isch u chum Lüt da si wäg dr Nebesaison. Üses Hostel isch direkt neb dr Basilika u drum simer oh die no hurti ga aluege.    Read more

    See translation
  • Michelle KienerSüd- und ZentralamerikaTraveler
    Im Norde vor Isla del Sol
    Ds isch e Brunne mit heiligem WasserE Tempelruine im NordeBi dem Tisch halte si ihri Ritaul abSi hei so Terrasse bout für ihri LandwirtschaftDie Stäge isch oh vo de Inkas bout wordeUfem Dach vor Fähre

    Isla del Sol

    June 26, 2024 in Bolivia ⋅ ☀️ 11 °C

    D Isla del Sol isch fasch ein Muss weme am Titicacasee isch. Schins sig ds nämlech d Geburtsstätte vo de Inkas. Dr Sunnegott Inti het annodazumal sini Chind dert here gschickt u ds sige de die erste Inkas gsi. Die Insle isch darum für ihri Bewohner, d Aymara, sehr heilig. Es het nid nume dert, sondern oh in den Tiefen des Sees no mega viel Ruine und heiligi Stätte.

    Mir si zersch miteme Butteliboot zwei Stund lang i Norde vor Insel gfahre. Dert acho simer vom ne Aymara begrüesst worde u er het üs de bis zur erste Ruine begleitet u viel Infos über d Insel gäh, was mega spannend isch gsi.
    Mir si när no witer gwanderet bis i Süde vor Insle. Drbi änderet sech d Landschaft immer wieder vo eher Karg bis recht Grüen. Dr Weg womer si gloffe isch vor Jahre vo de Inkas bout worde. Füre Weg brucht me guet 2.5h u mir hei eher weni Pouse gmacht. Da mir d Fähre für zrugg ume hei müesse verwütsche, isch ds oh nötig gsi. Zit isch scho eher knapp berechnet. Im Süde vor Insel gits es Dörfli u ds wär mega herzig, aber mir hei so schnell müesse düre loufe für a Hafe abe. Mir si de oh würklech uf die letschti Sekunde no uf die Fähre gstiege. Mini Füess hei richtig brönnt vom abeloufe. DHeifahrt isch nomau e gueti Stund gange ufem Boot. Diesmal simer aber ufem Dach ghocket u so heimer chli meh vor Fahrt gha.    Read more

    See translation
  • Michelle KienerSüd- und ZentralamerikaTraveler
    Unterwegs nach Yampupata
    Es Wägli gfunde für ufeBlick uf YampupataD Isla del SolD Isla de la LunaAm Sandstrand une

    Dür d Felder vo Yampupata

    June 27, 2024 in Bolivia ⋅ ☀️ 11 °C

    Üse letscht vou Tag in Bolivie heimer chli neb us vom Städtli verbracht. Mir hei üs am Morge ufd Suechi nacheme Colectivo (es Sammeltaxi) gmacht. Da mer kes hei gfunde, heimer eifach süsch es Taxi gno u hei üs uf öpe 45 Minute uf Yampupata la fahre.
    Dert heimer e Wäg gfunde dür d Felder, so das mer fasch ganz füre a die Landzunge hei chönne loufe. Dr Wäg ufe isch ume mau abentürlech gsi, aber obe acho simer eifach allei gsi u d Ussicht isch hammer gsi. Me het vo dert e super Blick gha ufd Isla del Sol und oh ufd Isla de la Luna.
    Bim abeloufe heimer üs no bitz verloffe. Dr Wäg het me nämlech nid mega guet gseh aube. Aber ds macht nüt, mir hei de de richtig Wäg oh wider gfunde.
    Wider im Dörfli simer no a Strand füre gange. Es isch aber dert oh nüt los gsi, wiu eifach nid Hochsaison isch. Mir hei de beschlosse wider zrugg uf Copacabana z gah. Drum simer wider iz Dörfli ir Hoffnig, das mer de grad es Taxi oder es Colectivo finde. Die fahre hie schliesslech nid gad regelmässig. Mir hei aber zwöi Froue mit Chind gseh am Strasserand warte u hei die gfragt, ob si oh uf Copacabana müesse. Tatsächlich hei oh si uf nes Colectivo gwartet. Si het üs de gfragt, ob mer würde 15 Bolivianos pro Person zahle (ds si knapp CHF 2). Ds isch viel günstiger gsi aus üse herefahrt u drum heimers natürlech zaut. So simer am früeche Nami ume z Copacabana acho. Dr Nami heimer no mit chli sy u packe verbracht u zNacht simer de fein ga esse.    Read more

    See translation
  • Michelle KienerSüd- und ZentralamerikaTraveler
    Bi dem Tor hinter üs isch Grenze woni bi drüber ghüpftHouptplatzKathedraleLüchtturm vo PunoAm SeeStrasse vo Puno

    Einisch uf Peru ghüpft

    Jun 28–29, 2024 in Peru ⋅ ⛅ 15 °C

    Gester heimer ume e Reisetag gha. Mir si vo Copacabana nach Puno gfahre. Di ersti Mission isch dr Grenzübertritt nach Peru gsi. Me het müesse usem Bus usstige u übereloufe resp. überehüpfe i mim Fall. Mir hei ämu dörfe ireise u si iz i üsem letschte Land zäme.

    Hüt heimer de dStadt Puno erkundet. Mir si ga zmorge näh u ner witer ufe Houptplatz u zur Kathedrale. Es isch hie vieles gad wider grösser u moderner im Verglich zu Bolivie. Mir si no a See abespaziert u hei dert Mönsche beobachtet u d Ussicht gnosse.
    Mir si iz de meh aus e Monet in Peru u si gspannt was üs hie no aus erwartet.    Read more

    See translation
  • Michelle KienerSüd- und ZentralamerikaTraveler
    Ufem Weg iz Inseldorf
    Üses ZimmerZ Inseli wo si lebeDr Mario u dr Ivan wosi üs hei zeigt wisi schaffeSo choche si de aubeTschüüsss Böötli, gueti ReisUfdr Terrasse vorem HüsliKitschige Sunneuntergang

    Jahrestag uf de Islas de Los Uros

    June 30, 2024 in Peru ⋅ ☀️ 13 °C

    Für üse erst Jahrestag heimer öpis speziells wöue mache u si drum uf d Islas de Los Uros ga übernachte.
    Mir si am Mittag vom Ivan am Hafe abghout worde und zur Uros Maya Lodge böötlet.
    D Uros si es Völkli wo uf Insle us Schilf lebe ufem Titicacasee.

    Z Zimmer isch mega gross u d Ussicht ufe See mega schön. Es isch extrem ruhig u idyllisch dert. Mir si herzlech begrüesst worde vor Mama Lea u vom Mario. Ds si d Eltere vom Ivan. Nachdem mer üses Gepäck hei abgsteut simer mitem Mario und em Ivan e Tour ga mache dür z Schilf. Si hei üs zeigt wie si hie täglich schaffe u lebe.
    Jede Morge am 4i gö si los u tüe Schilf abhoue. Ds bruche si dert zimlech für aus: zum Hüser u Möbel boue, zum Boot boue, zum Füür mache, esse chames und si wohne ja sogar ufem Schilf. Es wird nid ganz ar Wurzle abhoue, so dases nach ca. 4 Monet ume nachewachse isch. Während em schaffe tüe si aube im Schilf choche. Dr Mario het demonstriert wisi ds aube mache. Si tüe Fisch oder Vögu fah u ner e Chochtopf ufhenke. Dert wird Schilf anzündet u unter dä Topf gha bis es chochet.
    Us dem Schilf wärde oh Boot bout. Früecher sisi nume mit dene ume gfahre. Dr Mario het de es Miniboot bastlet u symbolisch üs zwöi dri gsetzt. Dr Julian het ds Minibootli de dörfe i See la gah u ds söu schins iz drü Täg dert umetriebe.

    Wider zrugg ufem Inseli heimer es super zNacht übercho, dr Sunneuntergang gnosse und üs no mit de andere Gäst unterhalte. Wius ir Nacht extrem chaut wird, het üs Mama Lea no Bettfläsche zwäg gmacht u mir hei unter dene vier Deckine de e kuschlig warmi Nacht gha.    Read more

    See translation
  • Michelle KienerSüd- und ZentralamerikaTraveler
    Uf dr Insel Taquile
    E Herr bim lismeDa sisi am tanze u musigeZwöi Froue am wäbeUssicht uf Landwirtschaftsfelder und See

    E idrückleche Inseltag

    July 1, 2024 in Peru ⋅ ☀️ 11 °C

    Mir hei tiptop pfuset uf üsem Inseli u d Mama Lea het es tolls zMorge parat gha. Nachem zMorge hei si üs bime Hafe im Inseldörfli abglieferet, wiu mer e Tour ufd Insel Taquile buechet hei.

    Uf dere Insle lebt es chlises Volk u si hei üs dert ihri Traditione zeigt. D Manne lehre mit 5i afa lisme u si hei de oh aus erwachsni ner immer öpis z lisme. D Farb vo ihrne Hüet zeigt, ob si ledig oder verhüratet oder ob si eine vode Häuptlinge (es git 20) si. Sisi ghürate tüe d Manne ihrne Froue jedes Chleid selber mache. D Froue webe de Manne e Gurt wosi mit Stouz trage. D Froue löh ihri Haar mega läng la wachse u wesi hürate schnide si se ab. E Teil dervo wird i dä Gurt igwäbt. Dr ander Teil trage d Manne aus Schmuck am Chopf.
    Si hei üs de no öpis vorgspiut u tanzet u ner heimer no dörfe zueluege bim wäbe u Souvenirs choufe. I ha de dert es Armbändeli kouft.
    Mir si witergloffe uf die anderi Site vor Insle u dert hets zMittag gäh. E feini Quinoasuppe u Fisch usem See resp. Omelette u Ris für mi. Nachem Mittag simer no zum Hafe abe spaziert u hei d Ussicht ufe See gnosse. D Insle isch mega ruhig und idyllisch.
    Dr Tag isch sehr idrücklech gsi u mir si zfride ume bi de Uros acho.
    Dr Mario u d Mama Lea hei üs no zrugg az Festland bracht. D Gastfründschaft isch riesig u mir hei mega viu dörfe erlebe i dene letschte zwei Täg.

    Iz geits witer vo Puno uf Cusco u das wider mau miteme Nachtbus.    Read more

    See translation
  • Michelle KienerSüd- und ZentralamerikaTraveler
    Houptplatz vo Cusco
    Blick ufe Houptplatz und dr Grund wiso mer id Kathedrale siDie Wand hei no d Inkas boutIm InkatempelIm Inkatempel2Si het mer ds Schäfli eifach id Finger drückt u i ha nüm chönne nei segeUssicht ufd StadtBim alte Aquädukt

    Cusco du schöni Stadt

    Jul 2–4, 2024 in Peru ⋅ ☀️ 21 °C

    Am Zischtigmorge simer ume am 5i am Morge mitem Nachtbus in Cusco acho. Er isch bitz agnähmer gsi aus dr letscht. Mir si de direkt zum Hotel gfahre u hei zum Glück scho dörfe ichecke. Drum simer nomau paar Stündli ga liege. Wos de het hunger gäh simer ga zmörgele u ner eifach mau für d Stadt gloffe. Cusco isch mega herzig u suber. Mir hei de no e Kathedrale und e Inkatempel bsuecht. D Stadt isch oh sehr touristisch, da si Usgangspunkt isch für vieli Wanderige i dere Region und natürlech füre Machu Picchu.

    Am Mittwuch heimers üs chli la guet gah. Mir si a dem Tag beidi zum Coiffeur u hei üs e Inkamassage gönnt. Ds isch e Ganzkörpermassage gsi mit heisse Steine und no Aroma Therapie. Villech chli übertribe, aber es het guet tah u nid viel kostet. Mir si no witer zum ne Aquädukt spaziert u dert obe hets u herzigi Gässli gha. Zudem heimer so Cusco no vo obe gseh.

    Füre Donnsti heimer eigentlich no es Usflügli iz Sacred Valley plant gha. Mi Mage het de däm e Strich für d Rechnig gmacht, wiu er het gmeint, er müess zNacht vom Vorabe zrugggäh. Drum hani dr Tag im Bett verbracht. Da mir morn e mehrtägigi Tour starte, heimer oh no Hotel gwächslet. Gäge Nami heimer üs de mitem Guide u de witere Teilnehmende troffe. Er het üs z Programm vode nächste Täg erklärt u mir hei no gwüssi Vorbereitige troffe. I hoffe sehr mi Mage macht mit. Die Tour plani nämlich scho sit mindestens 4 Jahr. I melde mi auso i öpe 5 Tag ume u bis denn wirdi weni bis gar ke Empfang ha.    Read more

    See translation
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice