Siem Reap

Mer send guet und pünktlich uf Siem Reap gfloge. Vorher no en sehr ruhigi Fahrt metem Speedboot ufs Festland. De Flug het 1h duuret. Taxifahrt is Hotel het au 1h duuret und esch en Tortour gsi. De Taxifahrer het üs alli Toure vo Siem Reap welle ufdränge. Mer händ alles abglehnt und sind no nie so froh gsi, womer lm Hotel acho send. D'Chind händ chli Startschwierigkeite gha. Si händ sehr vill Närve kostet. De gits zwüschedure ame scho die Momänt, womer sich fröget, wiso mer das genau möched. 🙈
Aber denn... Wow, was füren Stadt. D'Tempel vo Angkor Wat sind sehr idrücklich. Es git sehr villi devo. Mer händ bis jetzt afe 3 verschideni ahglueget. Drundert au de berüehmti Angkor Wat. De esch au uf de Flagge vo Kambodscha z'gseh. Mer send jewils am Namittag gange, denn hets nümme so vill Lüüt gha. Es esch sehr agnehm gsi ond d'Chend händ würkli guet mitgmacht. De Nino esch sehr interessiert und het villi Frage, womer probierid z'beantworte. D'Mayra isch guet gloffe und umeklätteret. Ab und zue hetsi churz duredreihet, wennsi z'heiss gha het. Wohär si das ächt het. 🤔 D'Föteli gähnd nur en chliine Iblick. S'sälber gseh und erläbe esch unglaublich idrücklich. Ab und zue hämmer au no Affe gseh 🐒 Das ganze hämmer met üsem persönliche TukTuk-Fahrer gmacht, wo immer uf üs gwartet und denn wiitergfahre het. 😁🛺 (näi, es esch ned de ufem Foti 😅)
S'Städtli Siem Reap isch au toll. Es git viiill Märt und Sache zum luege und ab und zue au chaufe. 😊 Es git alles zum ässe und au d'Mayra chond uf ihri chöschte. 😅
Als chliine Ahaltspunkt, was da alles so choschtet: Üses Hotelzimmer, mit 3 Bett, Bad, z'Morge und Pool choschtet 40.- pro Nacht. Für üs isch alles sehr günschtig. Wemmer mal für 40$ z'Nacht ässid, esches sehr vill. 😅
PS: s'1. Foti esch no vo üsem Schnorcheltrip.Read more