Weder mol es Update

Mer händ üs scho es Ziitli nümme gmäldet... 😊
Es esch ned ganz eifach gsi in letschter Ziit. Mer händ üs sehr schwer da mit wiitere Unterkünft bueche, händ stundelang gsuecht und denn gliich ned gwüsst, was mer wänd. Mer händ üs enschide, nach Koh Lanta z'gah. D'Überfahrt ufem Speedboat esch chli schwirig gsi. Es het wider mal vill Wind und dementsprächend vill Wälle gha. De Nino hets leider gar ned guet vertreit 🤢 und het 1.2h chli müesse bisse. Zum Glück simmer 30min schnäller gsi als geplant.
Üsi Unterkunft isch sehr herzig gsi. Leider händ sich d'Chind en Stock, bzw. es Bett müesse teile. Das isch sehr schwirig gsi. Mer händ würkli vill gstritte und es esch sehr unentspannt gsi. Mer händ wider Roller gha und sind uf de Insle umegfitzt, sind go shoppe i de old Town, händ schöni Strandbeizlis gfunde und wunderbari Sunneuntergäng bestuunet. 🌅
Ein Tag simmer ufenes Tauchboot. De Frido het 2 Tauchgäng gmacht und de Räschte esch go schnorchle. Sehr schön gsi und mer händ vill gseh. Leider esches au da sehr windig und wällig gsi. De Rebecca esches nachem 1. Schnorchelgang nümme guet gange und si het nurno chönne ligge ufem Boot. 🤢🙈
Hüt semmer wiiter uf Koh Jum. Sehr en ruhigi Insle und die wedermal windigi Überfahrt het nume 25min duuret und alli händs guet überstande. 😁
Mer send jetzt da imene tüüüüüüre Resort am Strand mit Pool und d'Kind sind uf einisch weder mega entspannt. 😊
De Räscht vo de Reis hämmer jetzt buechet, dass üs die guete Hotels ned weder weggschnappet werded. 😅Read more