Cusco

Geschter Abig hänmer no s'Briefing für oise Inkatrail ghaa.
4 Täg Wandere uf de Spure vode Inkas. Mir froied ois mega! Es git denn no chli meh Details...

Denn simmer mit "de Dütsche ♥️" imene lässige Restaurant go Znacht ässe. Superschön aagrichted und im Verhältnis au günschtig gsii. Sie sind spezialisiert uf regionali Produkt und es hät sich glohnt. D'Manne händ Meersäuli gässe, aber es isch nöd so de Hit gsii (troche). Aber miis Ceviche isch mega fein gsii.

Hüt Morgä hämmer zur freiä Verfüegig ghaa, und mir händs bruucht. Für ei mal nöd di erschte sondern di letschte bim Zmorgä 😴😉

Nachher simmer no chli go Cusco aaluege, am eis simmer für d'Stadtfüehrig abgholt worde. Obwohl d'Kathedrale imposant und sehr gross isch, hämmer vill z'vill Zyt deet verbraacht. Denn simmer no ine Monestry gange und au deet hämmer vill müesse lose. Nachher simmer go drüü archeologischi Sites go aaluege. Mir händ etz scho es paar so Sites gseh, aber jedi einzelni isch iidrücklich. Was die Inkas da baut händ isch eifach unglaublich!

Mir händ ois etz entschiede, dass mir de Uusfluug is Sacred Valley morn nöd mached, damit mir ois no chli erhole chönd, bevor s'ganz grossi Abentüüür aafangt.

Funfact: mir händ hüt usegfunde, warum extrem vill Hüüser nöd fertig baut sind: sobald es Huus es Dach hät, müend Stüüre zahlt wärde. Extrem, wie vill Hüüser eifach ohni Dach sind 😜Read more