Inka Trail Tag 3 Chaquicocha-Wiñaywayana

10 km / 5-6 Stunde
Start uf 3650 mt, Camp uf 2170 mt

Phuuuu.... Es hät grägnet. Und zwar mega fescht. Scho ide Nacht häts immer mal wieder gschüttet und de Morgä hät nöd bessers Wätter braacht. Am achti simmer im strömende Rege losgloffe, aber es isch defüür mystisch gsii, dur de nebligi und regnendi Wald und de ganz Abstieg (ich schwöre, würkli fascht uusschliesslich de ganzi Abstieg!!!) hät us Stägetritt bestande.
Sobald mer mal dure nass gsii isch, hät mers au chöne gnüsse.

Trotz de erschwärende Umständ simmer am zwei im letschte Camp aachoo. Ufem Weg zum Camp hämmer no e Site mit 98 Terassene gseh. D'Inkas händ die zmitzt am Berg freigleit, damit sie Landwirtschaft chönd betriebe. Am spätere Nami gömmer no Wiñaywayana go aaluege.

Ich gange etz mal go Internet sueche, vorher hani churz mal ghaa...

Leider nüüt gsii, hans Internet nüme gfunde 😝 Janu. Etz chömed ihr denn di volli Ladig an Machu Picchu Tagebuech mitemand über...

Defüür hämmer die besagti Site no besichtiged. Ächt unglaublich, was die Inkas zmitzt im Dschungel baut händ!

Hüt hämmer no de Abschluss, will oisi Porter nöd mit uf de Machu Picchu chömed. Die händ echt en geniale Job gmacht, richtigs Teamwork 🤗
Zum Abschied hät oise Choch e Turte für ois zauberet. Nachem Znacht simmer sofort is Bett, morn morge werded mir mit Cocatee am drüü gweckt, will mir früeh los laufed...

Guet Nacht 😴😊Read more