Einisch um Tahiti

Hütt hani nomau e letschte Touchgang gha mit ganz vile Schiudchröttli u Fische, super gsi. Woni mis Züg usem Boot gno ha, hettmi dr Lionel gfragt, öbi nomau wetti cho. Ha gseit, dasi miner 10 Touchgäng gmacht heigi. Är hett de gmeint, är offerieri mir dä faus i Zyt u Luscht heig. Was fürne Frag! So cool, hani nomau chönne abtouche. När hani mitem Jörg abgmacht gha fürne Inslerundfahrt. Mir hei abr kener Nummere ustuuscht gha odr so, är hett gmeint, är chami eifach is Intercontinental. Am Afang ke Jörg, derfür bini e Milke übere Wäg gloffe u är hett mi mitgno zum Lynn a Pool, mir e Liegestuhl organisiert u de hani dänkt, dr Namitsch chani auso so ou verbringe. I bi de nachere Haubstung nomau dürs Hotel gspaziert u ha de dr Jörg gfunge. Mir si de no vo de beide Nöiseeländer zum z'Mittag iglade worde u de simer los, einisch um Tahiti ume. Wunderschöns gsi, dr Jörg hettmr ganz viu erklärt. Mir si de no fein ga ässe u leider hani när schlapp gmacht u de hettermi am Siebni ume heibracht. Zwe Stung speter bini scho im Näscht gläge. Mis Schlafmanagement hie isch auso miserabu 😊Meer informatie