Ziplineee😯

Sodeli am Sunntig isch grad no di zweit Tour ahgstande. Aber nöd wie gester mit em Boot sondern hüt mit em Tuktuk. Am 9.30 ischs losgange go d Insle erkunde. 🛺 Mer sind zu 3 verschiedene Beachs gange plus am Schluss no go Zipline, aber meh da dezue spöter…🤭
Dä ersti Strand isch dä „Nacpan Beach“ gsi. Es het nöd viel Lüüt gha und was no fast besser gsi isch riesigi Welle. Da het euses innere Kind so richtig Freud gha!🥳 Sind vo dene 2h wommer dete gsi sind öppe 20min dusse gsi, di restlich ziit isch i dä Welle umegumpt worde. Oke evt. hets eus au s ein oder andere mal gottlos verrüehrt.🤣 Aber Spass hets uf jede Fall gmacht.
Dä zweiti Beach isch dä „Lio Beach“ gsi. Det simmer eich Hauptsächlich am es Resti sueche gsi und hend di erst Duschi am ne Strand gseh sit mer i dä Ferie sind.😯 Sprich mer hend eus usgibig Duschet da mer nach em Welle gumpe echt überall Sand gha hend…🤣
Dä nächsti Stopp isch s Zipline gsi. Es isch recht zackig gange und scho sind eusi Nummere ufgrüeft wordä. Kurz alles ahzoge und denn ischs au scho losgange. S Zipline an und für sich isch jetzt nöd meega krass gsi es isch lässig gsi die mega Ussicht dörfe z gseh aber es isch recht langsam gsi und vorallem hets öppe 15 meter vor em Endi ahghalte, sprich mir sind denn eifach im nüt umebambeled bis eus di andere zwei gholt hend. Das isch für d Höheangst wo mir hend nöd grad förderlich gsi.🫤😂 Aber isch lässig gsi s mal gmacht z ha.😇
Dä letscht Strand isch grad i dä nöchi gsi und zwar dä „Las Cabanas Beach“. Mer hend eus det i dä erste Reihe en Tisch gschnappt und ahgfange UNO spiele. Nach öppe 30 Minute sind per Zuefall no die zwei wommer gester uf em Usflug kenne glernt hend verbii gloffe. Sie hend sich denn zu üs gsellt und s UNO Battle isch wiiter gange.☺️ Mer hend denn no en richtig hübsche Sunneundergang dörfe ahgugge. 🌅
Am Abig hemmer eus denn ready gmacht und eich grad welle id Stadt gha wo plötzlich alles dunkel worde isch und s Notliecht ahgange isch. Mir zerst nöd drus cho was da grad los isch doch bim erste Blick nach dusse isch eus denn schnell klar gsi mer hend Strom usfall im ganze Dorf. Da mir da kei Netz hend und s Wlan ja logischerweis nöd funktioniert simmer denn dihei bliebe da mer nöd im komplett dunkle hend welle 20 minute id Stadt laufe 🙂 Zum Glück hemmer en Film abeglade gha und somit en chline Film abig gmacht. 😌Read more