Check In Chaos.🇨🇭

Mit so viel Freud wie hüt am morge hani de Briefchaschte scho lang nümme gleert. Tatsächlich hends de internationali Füehreruswis wie au mini Devise no rechtzitig zu mir gschafft. Woni den de Risverschluss vo mim Rucksack mit mine siebe oder eher acht Sache auno zuebracht han, bini langsam startklar worde. 🧳

Am halbi 4 hend mi sTaxi Sabi + Manu dur de zürcher Stau, an Flughafe chauffiert. dWarteschlange am Check In isch den jedoch no einiges schlimmer als de Stau in Züri gsi. Will de Flug uf Istanbul mit 26 Lüt überbuecht worde isch het eis Chaos gherrscht. Niemert het recht gwüsst was lauft und dInfos sind nur uf türkisch dureghe worde. Han gmeint mir seget amne schwizer Flughafe? Unglaublich.🤦🏻‍♂️ sPersonal het de glueget öb sPassagiere irgendwie uf anderi Gsellschafte umbuecht werde chönd und dur das isch alles uh lang gange. Endlich am Schalter ahcho hends mer den gseit si chenget mer kei Boardcharte usstelle aber ich söll eifach mal ufs Gate vlt hegi den Glück und chem no en Platz über. Ja easy, hani ez au nonie ghört aber machemer doch.😵‍💫 Woni den de Schalter verlah han hettmer de Typ hinderem Schalter no zuegrüeft vowege dass ez wieder ein Platz frei worde isch und er mir trotzdem en Sitzplatz garantiere chan. Huiuiui da ischmer grad en Stei vom Herze gfalle, hans Flugi scho ohni mich flüge gseh. Schnell dur Passkontrolle gspeedet, ufm Gate ahcho und da isch de Trubel witergange. Sie suechet 16 freiwilligi Persone wo erscht morn uf Istanbul flüge wend und mit Übernachtigschoschte, Verpflegig und mit zuesätzliche 400 Euro entschädigt werdet.🤑
I 5 Minute söttmer flüge aber s‘Chaos ufm Gate het sich nonig würkli beruhigt. So wies usgseht hends nonig gnueg Freiwilligi gfunde und x Personne stönd ohni Boardcharte und ohni Sitzplatz da.
Zum guete Glück han ich min Sitzplatz. dSituation selber stört mich momentan grad nöd, da dur dVerspötig min Ufenthalt in Istanbul weniger lang wird.🥲Read more