Cap D‘Adge, Okzitanien ☀️

Am Mäntig simmer ca. 4 Stund richtig Süde id Region Okzitanien Südfrankrich gfahre und hend üsi Unterkunft im Cap D‘Adge gha.
Mier hend ide Unterkunft 2 Zimmer gha, voll okee gsi, es hed eifach nur ei Fenti gha und kei Klimaahlag, isch dementsprächend au rächt warm gsi. Am Abig mit de Fänster offe und de Fenti zwüsched beidne Zimmer ischs aber voll gangä. Sind ja au praktisch nie ide Unterkunft gsi. 😊
Chum ahcho hemmer üsi Skate- und Kickboards gschnappt und sind ah Strand abe, wo 10 Min Fuesswäg entfärnt gsi isch. Mier hend chli bädeled im Meer und sind spöter imene mexikanische Restaurant direkt am Strand go Znacht ässe.
Am Ziischtig hemmer chli en abglägene Strand gsuecht und hend chli meh östlich au eine gfunde. Mier hends zu üsere Ufgab gmacht mit Schwämmholz Hütte z bue, willmer kei Schirm debi gha hend und au keine hend welle chaufä. ⛺️ mitmene Fixlintuech womer mitgnu hend hemmer s Dach gmacht.
So hemmer de ganz Tag mit Bade, Sändele, Drache flüge und chille verbracht, so hemmer üs üsi Ferie genau vorgstellt. 🌊☀️Nachm Znacht ässe hemmer nu de traumhafti Sunneuntergang gnosse. 🌅
Am Mittwuch hemmer genau s gliche gmacht dur de Tag nur dasmal meh westlich ade Küste. D Schwämmholzhüttä isch üs sogar nu besser glungä. 😂 Am Abig simmer mit üsne Gfährt is Städtli Adge gfahre, hend superfein Znacht gässe und spöter hemmer de Chind nu en Freud gmacht und sind ine Friiziitpark. Sind den erscht am 12i heicho, d Chind sind eifach unglaublich toll druffe gsi und hend sehr gued mitgmacht. S ane- und heifahre mit de Kickboard hed doch je ca. 30 Min dured.
Hüt gads wiiter ufne Buurehof wo zwüsched Süd und Westküste isch. Simmer mal gspannt was üs det erwarted 😍Læs mere