Stavanger🚲🍕

Di Nacht bini leider gäng ume ufgwachet, ds erstä mau am 2i ir Nacht, wüu im Ungerstang näbädranne es paari äuä no e gaanz lustegi Rundi Ping Pong gspiut hei... am haubi 7ni ischmers du volländs verleidet u bi du ufgstange. Woni vom Zängputze bi zrugg cho isch Ami oh scho am Ufruume gsi. So heimer zämäpackt u si losgfahre... während derä 30 minütige Fahrt merkimer, das di Insle "Tysensøy" äuä chli e ermeri Gägend isch. Es isch aus chli heruntergekommen u nid so pflegt. Da mir chli früecher los si, hetsnis ds Hodnanes sogar scho uf d 8:20Uhr Fähre glängt. No bi dickem Näbu u Rägä heimer aber nüt gseh vo derä 10 minütige Fahrt. Vo Jektavik bis zur nächschte Fähre uf Arsvågen isches veiechli e abentürlechi Fahrt gsi. Über Brügge u dür Tunäu simer obde u ungerde Fjorde düre, es het grägnet u zum Tiu no veiechli gchuttet. Leider heimer haut d Witsicht nid so gha wo wahrschiinlech no schön wär ds luege gsi, mit denä Insle u gäng ds Meer zwüschinne. Di fahrt isch öppe 1.5h gange bismer nacher churze Wartezit hei chönne ufboote. Di Fähre isch när uf Mortavika 24 min. gfahre. Womer si drab gfahre heimer grad sofort gmerkt das ds chli e angeri Insle isch. Uf derä Insle namens "Rennesøy" isch nämmlech aus grüen gsi u oh zimmlech aus bewirtschaftet worde u aune Orte hei Schaf graset. Wägä dessi hami drzue entschide uf derä Insle no hurti e schlänker ds mache bevormer när nachem letschte Tunnu uf Stavanger si cho. Dert heimer grad sofort dr MC ahgstüüret, mir hei beidi Hunger gha u es ischnis grad drna gsi. Mir hei schliesslech oh nüt richtigs Zmorge gha. Nach derä verchöschtigung simer no gschwing zu de "3 Schwerter im Fels". 3 10m höchi Schwärter wo ad Schlacht am Hafrsfjord im Jahr 872 erinnere. Am 14:00Uhr heimer när im Airbnb chönne ihcheckä u nis afe eis chli chönne erhole, isch irgendwie no e strängi Reis gsi hüt. Uf di 5i heimernis när mite Velo vor Gastgäberin ufe wäg gmacht id d Autstadt vo Stavanger. Richtig cooli Aktion vor Beata, so heisst di Gastgäberin, das die zur Ungerkunft no 2 Velo Vermietet. Oh wes 2 auti Gschwür si, für üs si die perfekt. Ca. 15min. heimer gha id Stadt u hei d Velo ane Kandelaber gchöttelet. När simer chli ds Fuess er Promenade nah, dür d Autstadt u dür di "farbige Gasse" gschländeret. Mir hei chli nach guete Resti usschou ghaute u schliesslech bire Pizzeria haut gmacht. Ahschliessend simer witer id "no Stress" Bar gahne Cocktail näh. Huere siech isch dä Aukehou tüür. Es 0.5l Bier öppe 12Fr. u e Longdrink öppe 14Fr. När simer wider zur Ungerkunft gradlet. Dert ahcho isch di huere Türe nümme uf. D Gastgäberin het sones Elektronisches Türschloss mit Zahlecode u ds hetnis eifach nümm wöue ichelah. Wo du nachem Lüte bi ihrere Wohnig u nachem schriibe ufem Handy nüt isch zrugg cho simer du bau chli närvös worde. Aber nach öppe 10 min. hetsi du zrugggschribe u üs verrate dassi no e Ersatzschlüssu ime Schlüssuchäschtli het. Zum Glück! So ab i ds Näscht, morn weimer früech uf.Baca lagi