❤️🇸🇪🇧🇻🇩🇰❤️

Hüt Morge si mir scho am 4:40Uhr uf u hei no chli Zmorge gnoh u nis zwäggmacht füre nächscht Usflug. D Vorfröid isch gross! Mir si i ds Outo u losgfahre. Düre 14,4km läng Ryfylketunnelen ungerem Fjord düre simer richtig Preikestolen. Dr Parkplatz isch afe chli ufem Hoger obe gsi, aber für ufe Preikestolen geits när schono tou obsi. Gnau gseit öppe 500 Höhemeter. Öppe 40 Min. simer gfahre. Pünktlech am punkt 6i simer ahcho u öppe 5 ab los gwanderet . Mir hei da, wisech speter de het usegsteut, e sehr guete Tipp befougt mit früech losgah. Am ahfang isches zimmlech stotzig ueche u es si hie u da einzelni lüt ungerwägs gsi. När isches über schöni Steiwägli u Houzstägli, wo schiins Nepaleseschi Sherpas hei gmacht, witer, mängisch stötziger u mängisch flecher. Nach öppe dr Heufti heimer zerschte mau ganz wit hinger dr Lysefjord gseh. Aber ds isch no nüt zu däm womer när hei gseh. Überne Grossi Feusäbeni simer zumene Houzstäg cho wo are Klippe nah het gfüert u no eis überne Feusäbeni u när geiz eifach uf ds mau vor eime ca. 600m ds Loch ab u ungerdrann erstrecktsech dr ganz Lysefjord vor eime. Eifach dr Hammer! Di Ganz grossi Feusäbeni, äbä dä Preikestolen (deutsch: Predigtstuhl) isch zwar scho oh ihdrücklech, vorauem wüus haut würklech 600m sänkrächt drüber us geit, aber gägä di Ussicht isch ds nid so spektakulär. Mir hei ca. 10min. ufem Preikestolen wi für üs gha, (es si ca. 4 angeri Lüt dert gsi) womer hei chönne fötele u gniesse. D Sicht isch veichli guet gsi. Mir si när e chli drufueche gahnes Tee plöderle u chli PickNicke womer när gmerkt hei, wi viu Wärt ds früech ufstah würklech isch gsi. Es si gäng wi meh Lüt cho ds ströme. Es hetsech sogar e Schlange biudet ufem Preikestolen, so das jede sis Föteli het chönne schiesse. Tiu gigle hei sogar Drohne füre gnoh obwous eigentlech verbote wär, ds huere glärm het de ufgregt...! I ha bau chli Schadefröid gha wo uf ds mau chriisdicke Näbu isch cho. Nacheme cheerli hets du när scho wider uf tah, u die wo währendem Näbu hei es Föteli gmacht, hei natüürlech när no eis müesse! Isch ömu no spannend gsi däm Triibe chli zue ds luege u mir hei vo obe ache perfekte Blick uf ds Gschehe gha. Nacheme cheerli ischnis du ds ganze verleidet aber mir hei vo derä Ussicht gliich no nid gnue gha. Drumm simer e Hügureihe übere. Ganz herrlech! Dr Preikestolen mit däm Ameisehuufe druffe heimer numeno vo witems gseh u d Ussicht isch sogar no fasch besser gsi. Für ds fescht ds haute heimer no par Säubschtuslöserföteli gmacht. Woni no chli witer füre bi für par Föteli ds mache chöme zwe u dr Eint seit "not that impressive the Preikestolen, the view here is even prettier" i hanim zuegstumme u mir hei chli änglisch zämä gschnorret. Wonimi du verabschidet ha seit dise zum Angere "Komm wir gehen hier rüber". I ha müesse lache u hanim när gseit dasmer de gschider oh zämä Dütsch hätte gschnorret. Es si zwe vo Freiburg gsi. Item... mir heinis du när ömu ufe Abstieg gmacht, wo nümme sone hit isch gsi. Di Lüt! Abartig! Zum Tiu hetme nidemau chönne chrütze. Chinese u Spanier u Araber u angeri Schwizer, aus wot uf dä Preikestolen! Mir heis du mit chli närve gliich no ache gschafft u si zrugg zur Ungerkunft. Ca. 12i isch gsi womer zrugg si gsi. Mir Dusche u legenis no eis hurti uf ds Ohr, ha ds gfüeu hinech chönnts e chli speter wärde. Ds Norwege fiiresi morn nämmlech ds Mittsommernachtsfest u da tüeigesi schiins am Abe vorhär no chli feste u d Schwiz spiut ja de oh no gägä Dütschland. Mir hei gester abe nämmlech es par Public Viewings gseh. Mir si öppe am 5i usem Huus, wider mau mite Velo, zume Mittsommernachtsahlass am Meer. Dert ahcho heimer e grosse huuffe mit Paletten gseh wosi de speter wei ahzünde. Es het scho par Lüt dert gha u es het irgend e Schueu meh u minger schöni Musig gmacht. Mir hei oh ihtritt zaut wo aber de denä Schuele wo Musig mache zguet chunnt. Mir hei afe no e HotDog une Hamburger gschnabuliert wo ganz eifach gmacht isch gsi. Eifach Brot u Fleisch u när hesch no säuber Röstzibele, Kätschöp u Sänf chönne druftueh. Mi hets ömu chönne ässä. Zahle hätmä aus mitere App söue wo mir natüürlech nid hei gha drumm heimer so zure Muetter quer über ds Festgländ müesse, für dert mitem Chärtli chönne ds zahle. Mir si när ufeme Feus obe abghocket. Dusse im Meer heisech scho par Boot ufgsteut gha wo äuä de ds Füür vo dert us wei luege. Was söui sägä, esch sehr charmant gsi u es het lüt vo jung bis aut gha aber es isch äuä scho meh sones Famileding gsi. Bier hets nämmlech oh kes gäh. So heimernis du haut entschide witer ds gah. Mir hei natüürlech oh müesse prioritäte setze wüu ds Füür u dr Schuttmätsch ame Public Viewing ds luege geit haut nid beides. Mir si när quer dür d Stadt gradlet i ds "Proudmary Pub". Leider isch dr Schwiz Mätsch dinne gloffe u Schottland-Ungarn dusse. Aber itze. D Bier si ömu fein gsi (ds isch de sehr wichtig we eis 14Fr. choschtet) u dr Mätsch het oh lang huere guet usgseh u isch veiechli spannend gsi. Schad hetme nid gwunne, de Dütsche um üs um hätis möge gönne. Mir si gloub di inzige Schwizer gsi i däm Pub. Aber henu, gliich guet gsi. Ufem wäg zum Velo zrügg simer no ame Dönerlade verbi gloffe u da heimer nid chönne widerstah. Aber när simer du hei gradlet u öppe am haubi 1 simer d Ouge oh zuegheit.Læs mere