Neuer Tag neuer Versuch

De Morge hed am 6i am Morge meteme Outdoorworkout gstartet, da esch schomal es super Start i Tag gsi😍☀️ond au bem Schaffe esches scho vell besser gsi, de ganz Morge hei mer selber döfe Patiente vo jong bis alt met verschedene Bedürfnis begleite ond instruiere, da hed so vell Freud bereitet, au welsi eus so vertraut hei🥰.
Am Nomittag hei mer de metem Neurolog Sprechstonde gfüehrt. Meh cha wörkli vo metgfüehrt rede, er hed eus nehmli emmer gfrogt, was mer meine, woher s Problem chönt cho ond eb Ergotherapie sinnvoll esch oder ned. Während de Sprechstond heimer de au grad paar Üebige met de jewillige Patiente dlregfüehrt. Send also sehr en aktivi Patientesprechstonde gsi😄. D Krönig esch cho, wo er erfahre hed, dasi mi met Medikament uskenne, de hed ech sele met ehm entscheide, weli Medikation passt aber det hanimi de schnell drusgnoh, da esch ned definitv ned mini Kompetenz😄.
Nachem Schaffe, es direkt metere Swahililektion im Hostel witergange. Schneller hedme glaubi nömme chöne die Lektion gstallte, so nachem Motto möglichst vell Wörter i möglichst korzer Zit. Nüt vo Pole pole😄.
Nacheme feine Znacht, heimer de no för die Einti, wo höt Gebortstag gha hed gsonge ond send ufne Rooftopbar epis go trinke. Det semmer ine ganz anderi Welt itaucht, als die wo mer bis jetzt vo Arusha kennt hei. Es esch es wonderschöns, riesigs Hotel gsi ond s Ussicht esch so schön gsi. Mer hei weder mal gstundet wie schnell me do en Afrika, chan ine völlig anderi Welt itauche.
Weder dehei het de Gebortstagskueche natürli ned döfe fehle🎂. Nacheme gmüetelche Obe met all eusne Metwohner, flüge mer jetzt müed is Bett ond send gspannt, was de morgig Tag bringt.
Usiku mwema lala vizuri🫶Læs mere