Afrika

Höt Morge hed euse Wecker 04:45 Uhr glüte, no onderem Sternehimmel heimer zäme met eusne Guides Zelt abbaut. Während em Zmorge, hed sech de Himmel langsam afo rosa, rot ond violet färbe, es esch so wonderschön gsi. Nachem Zmorge hets gheisse Auto belade ond los. Leider eschme en Afrika halt trotz Methelf ned so pönktli ond euse Plan met wörkli am Fahre sie ond Tier beobachte während dem z Sonne öbere Horizont hed zitlech ned ganz so öberigstomme aber schön esch de Sonneufgang alle male gsi. Emne schnelle Tempo semer ufem direkte Weg rechtig Ngorogoro Nationalpark gfahre, plötzli esch de sogar no en Gepard nebe de Stross ghocke ond hed sis Zmorge uf desere Site vor Stross beobachtet. Ufem Krater obe acho, es de öber 600 Höhemeter i de riese Krater inegange ond somit in Ngorogoro Park😍. De esch vor Flora ganz anderst gsi als de Serengeti. Meh Steppe, vell grüen ond waldig zwischedöre ond i mitti e grosse See. Es hed au anderi Tier gha. Det send vorallem Vögel, Zebras, Elefante, Wasserbüffel, Warzeschwein, Schakale ond s tollste Nashörner dehei😃🏞. Glöckspilz wie mer send heimer grad 3 Stöck gseh, so idröcklech gsi. Aber au die andere Tier hei sech vot beste Site zeigt ond mer hei so vell Tier weder chöne gseh. Nacheme feine Zmettag esches de langsam ufd Heireis gange, hei nehmli no öpe 4h Weg vor eus gha. Öber stock ond stei es de öbere Pass zrög gange. Wenmer da Wocheendi epis gmacht hei, de es döregschötlet wärde ond ergendwie porbiere möglechst Usgliche😄😄.
Nachere witere Stond, semer endli weder mal ufne Teerstross cho, so es komischs Gfühl gsi. Nach ca 1h heimer de es Massaidorf erreicht, det hei mer no e korze Stopp igleit ond send meteme traditionelle Tanz begrüesst worde. Im Dorf inne heisi ehri Lehmhpsli zeigt, 2m uf 2m meh Platz esch det inne ned. 1 Bett för 6 Lüt ond e Köbü ufere offne Füürstell zom koche. Wosi Fleisch, Milch oder Mais zuebereite. Meh gits ned, man isst was es em Dorf git. Mer hei au no de Kindergarte go aluege, da hed be mer sehr vell usglöst, die Kind det im Dreck sitze gseh ohni nüt, hed mech sehr nachdenklech gmacht. Aber ned nor da au ehri ganz Kultur ond Lebenstil. Bede Massai esches so, dases 1 Mann geht met mehrer Fraue, je nach dem wie vell Küeh du hrsch ond demensprechend Fraue vo anderne Dörfer chasch kaufe. Es geht kei Strom, ke Liecht, ke fliessends Wasser. Es esch e Lebensstil wo mer eus ide Schwiiz ned chönte vorstelle, selbst en Arusha wo nor 2h entfernt esch, esch so es Läbe ned denkbar. Nach dem Stopp, hani vell Ziit gha bis dehei. Ond es hedmi scho sehr nachdenkli gstomme. Wieso entscheidet meh sech jede Tag so zlebe? Wieso hedme no so en Istellig? Wieso loht me sech als Frau so loh behandle? Wo esch do au rechtlech en Grenze? Es esch es Volk wo mer zwar be eus en Europa devo wösse ond trotzdem weme de det stoht ond da gseht ond au so ire Selbstverstäbdlechkeit verzehlt bechont, macht da epis met eim. Es hed mer wie scho paar mal uf dere Reis zeigt, wie glöcklech mer eus döfe schätze ide Schweiz chöne zlebe ond wie guets eus goht.
Aber witer gohts met eusere Röckreis. Nach witere 2h semer endli dehei gsi, met Honger heimer zerst Mal Znacht gesse. Nachem Esse, hets för mech aber de glich no Bewegig brucht ond e ha no es korzes Workout gmacht. Ond nacher..... nacher hets endli e warmi ond langi Duschi geh. So vell Dreck wieni das Wocheendi glaub abbecho ha, hani glaub nonie am mer gha. Mer hei ned gwösst ebmer wörkli brun worde send oder eb da nor de Dreck esch, wo vom velle Staub uf dene Offroadstrosse a eus klebt esch😄😄. Aber trommelwirbel, e bizli Farb heimer wörkli agnoh😉☀️. Mer hei 3 wonderschöni, sonnigi ond warmi Täg gha, e glaub besseri Täg hätte met ned chöne verwötschte😍🫶.
Müed ond glöcklech sitzi jetzt no meteme Tee ufem Balkon ond schriebe do alles uf ond probiere zverarbeite, wasi alles ha döfe gseh ond erlebe. E be so dankbar, döfi do sie ond alles erlebe, mengisches esch emmerno biz onrealistisch🩷.
Meteme schöne Gfühl ond velle Idröck, heisst för mech, Schlafenszeit🌟Read more