Madrid

Nach Zaragoza simr uf Madrid gfahre. D' Umgäbig ufem Wäg dert härä isch atemberoubend schön! Z' Land isch vouer Hüglä u mit Büsch u chliinä Böim. Mä gseht über witi Täler u nur vereinzelt chömä paar vrsteckti Stedtli fürä. Hie und da prangt widr dä riiiesig Stier vomnä Hoger obä abä u süsch isch praktisch nur wiudi Natur rundumä. Sehr iidrücklech!
Z' Madrid aacho heimr ä Camping gfungä, hei CousCous gmacht u när no Fium gluegt.
Gester simr Madrid gah aaluege. Ä sehr lebändegi Stadt (übrigens die 3. Grösti vor EU), wo mega viu louft. Mir si verschidnigi Sehenswürdigkeitä gah aaluege, u.a. dr Plaza Mayor, ä grossä Platz, umrundet vo wunderschönä autä Hüser. Witr simr zum Mercado de San Miguel, ä grossi Markthaue mit verschidenstä Köstlechkeitä. Hie gits unger angerem verschidensti Tapas, sehr fein!
Nach derä chliinä Zwüschevrpflegig heimr wöuä inä riesigi u wunderschöni Kathedralä gah, hei abr wäg üsnä churzä Chleider müessä umcheerä. So simr haut witr u si zum Palacio Real gloffä. Dsch dr Palast vor spanischä Chünigsfamiliä. A Platz manglets dert ömu nid, riiiiiiiesig isch ds Geböide! Da mä het müesse zahlä fr ar Adelsfamilie it Stube z' luege, simr ussedürä zumnä Park gloffä. Vo dert hetmä no einisch ä wunderbarä Blick ufs Chünigshuus chönnä wärfä. Ungerdessä isch d' Hitz fasch chle unerträglech wordä u mir si sehr froh gsi, het Madrid viu höchi Hüser, wo Schattä wärfä. Zwüsche dä Hüser het ä ganz bezouberndi Kuppä fürägluegt, wo üs het gwundrig gmacht. Auso simr dert härägloffä. Leider het die Chiuchä zue gha. So simr widr its Stadtzäntrum gmarschiert, grad zumne witere Platz, Puerta del Sol heisstr. Dert isch die berüehmti Bärä-Statue "El oso y el madroño" - dr Bär und dr Ärdbeerboum.
Speter simr gah traditionell Znacht ässä is Puerto Rico u när, nachemä Abstächer i Primark, widr mitr Metro ufe Camping.
Ahja, lädelä chamä z' Madrid sehr guet...
Hüt geits uf Ávila.Read more