Ávila

Grossi Nöiigkeit: dr Alj isch upgradet wordä! Är het churzerhand nöii Batterie bcho. Itz loufter wines jungs Rehli.
Dr Wäg uf Ávila isch bezoubernd! So ungloublech schöni Landschaftä u hübschi Stedtli zwüschinä. Mir chöi nur stuunä!
Ungerwägs simr no gah iichouffä – Sirup kennesi hie nid. Wemä nach Sirup fragt gits Caramel- oder Ärdbeersauce fr über Desserts odr Honig. U wemä mitm spanischä Wort fr Sirup (lut Google-Übersetzig) geit gah fragä, bchunntmä iigleiti Frücht. Zum Glück si d' Spanier so mega hiufsbereit (Telefonjoker Ehemaa, wo Änglischlehrer isch) u humorvou, da isch z' Übu grad haub so chlii.
Augemein isch sehr z' erwähnä, wie ungloublech offä, fründlech u äbä vorauem hiufsbereit d' Lüt hie si! Da wird eim grad warm ums Härz bi so viu positivä Begägnigä.
Churz vor Ávila heimr eigendlech ufnä Camping wöuä, dä het abr leider scho zue gha. D' Mannä vo dert hei üs när auerliebst uf spanisch erklärt, wo dass dr nächscht Camping isch oder wo dass mr härächöi. Auso simr uf Ávila inä.
Dert hets leider gar keni Campings odr so gha, o nid ir nöcherä Umgäbig. So simr haut ufnä Steuplatz (odr Parkplatz, niemer weiss) ohni WC u Duschi. Mir hei üses Znacht ufem Trottoir gmacht u üs dert haut es eigets Plätzli iigrichtet. Paar irritierti Blickä heimr kassiert, abr mitr Dunkuheit vor Nacht, het o ds abgnoh. Im Alj heimr no dr 2. Panem-Fium gluegt u hei ner gschlafä.
Hüt simr, wüumr so nöch vodä autä Muurä vo Ávila hei übernachtet, zimlech früeh gstartet fr ds Burgstedtli gah z' luegä.
Chuum dür z' Stadttor inächo, simr scho zur grossä "Catedral d' Ávila" cho.
Die isch riesig! Sie umfasst mehreri chliini Kapällä und ono es Chloster. Dert isch d' Teresa von Ávila gsi, odr Santa Teresa de Jesús, wisise hie nennä.
Dr Rundgang dür die Kathedralä isch miteme Audio-Guide kommentiert wordä. Sehr spannend u informativ gsi! Am Schluss heimr no ufä Turm chönnä, wo ono gfüehrt isch gsi. Dert heimr bspw. d' Wohnig vom Glöckner chönnä gah luegä. Und z' oberst heimr ä wahnsinns Ussicht über ganz Ávila dörfä gniessä – wunderschön!
Speter simr no ines kuuls Beizli gah Burger ässä, z' Stedtli mit sinä charmantä Gässli gah erkundä u när zum Alj.
Am Aabä simr los uf Salamanca u dert ufnä Camping.Read more