Salamanca

Hüt simr mitem Bös uf Salamanca inä. Ds Stedtli het üs mit sirä Pracht überrascht! Sone hübschä Ort mit ganz viu bezouberndä Hüser u Gässli.
Z' Wätter het natürlech o ä grossi Rouä gspiut. D' Sunnä het die sandfarbigä Hüser lah goldig lüüchtä u dr Himmu het mit sim chüniglichä Blau ä perfektä Kontrast botä.
Was krass isch gsi, si die vilä Lüt, vorauem vili Touristä. Siteme Zitli heimr mau widr äs Stedtli gha, wo d' Lüt wie Ameisi si umegwimmlet.
Gah aaluege simr hie d' Bibliothek, d' Kathedralä, dr Plaza Mayor u die bekannti Brügg. Bir Kathedralä isch widr erstuunlech gsi, wie schön u fiin dass sie dr Stei bearbeitet hei u was fr kunstvoui Vrzierigä u Biuder sie i Stei gmeisslet hei. Vorauem überem Houptiigang isch äs wunderbars Biud gsi: Jesus, wiener am Palmsunnti ufem Esu rittet. Sehr berüehrend!
Ahja und ines Hochzit simr o widr ineplatzt. Dismau voruss u mit ganz viu angernä Touristä. Geng widr ä Ougeschmaus u ä härzerwermendä Moment.
Widr mitem Bös zrugg zum Camping, heimr üsi Hautsteu vrpasst. Zum Glück isch dr Camping churz vordr Ändstation gsi, so het üs dr Böschauffeur mitgno um paar Kreislä u schlussendlech heimr kehrt u si de doch no bir richtigä Hautsteu glandet.
Itz simr z' Burgos u schlafä hie ufemä härzigä u ruhigä Camping.Read more