León

Gester simr uf León gfahrä. Leider hei hie aui Campings scho zuegha... Zum Glück si die Spanier sones tolls Vouk u so heimr gratis ufemnä Restaurant-Parkplatz chönnä wohnä. Mir hei üs dert vei usbreitet, mit Chuchi u Ässtisch. Währenddäm mir üses Festmauh hei iignoh (Fajitas), heisi näbädran gspörtlet u geng widr si Spazierendi vrbi cho. Z' Tollä u Überraschendä isch gsi, dass die Lüüt nid eifach si vrbi gloffä, sondern si sie aaghautet, hei ä Guetä gwünscht und mit üs wöuä redä. Leidr isch üses Spanisch sehr manguhaft, was mir zimlech beduurä. Glich heimr üs mit Häng u Füess mitem Gägenüber chönnä verständigä. 2 bsungers gsprächegi Päpplä hei üs aues Müglechä über d' Umgäbig vrzeut u üs o viu Fragä über üsi Routä gsteut. Schlussändlech hetsech dr eint no uf üsä Alj vrewigt ungerem Pseudonym "El Picasso" und dr anger, wo chle änglisch het chönnä, het üs uf sympatheschi Art usglachet fr üses Spanisch. Herrläch lustegi Begägnig gsi!
Im Cinema Alj heimr no dr letscht Teil vo "Panem" gluegt u si när ungerä.
Hüt simr gah León luegä.
León het o widr ä Plaza Mayor, so wie jedi Stadt sit Madrid – geng widr äs Heicho diä Plätz.
Was o widr isch, isch d' Kathedralä wo z' Stadtbiud prägt. Dismau simr widr inä – und üs hets d' Sprach vrschlagä! So umwärfend schöni Chiuchäfänster i aunä Farbä! Ungloublech berüehrend die z' bestuunä u drzue d' Gschichtä drhingr z' ghörä.
Nach León simr ufnä Camping, ca. 1h usserhaub. Dert acho simr zersch vor verschlossenä Türä gstangä u mir hei scho unzfridä drvo wöuä, wo plötzlech doch no ä Maa isch cho z' loufä. Är isch zwar nid vom Camping gsi, sondern o Gast, hets aber anschiinend guet kennt u üs inäglah.
Scho bim Iirichtä u Usbreitä heimr Bsuech becho vomnä Rotbrüstli, Piper gnennt. Ds isch ganz nööch zuenis cho u hetsech vo üs lah fuetterä! Ganz äs Clevers!
Nachem Znacht simr vom Maa, wo üs ufä Camping het glah und sirä Frou no ufnes Tee (eigendlech Kafi, abr ds trinkemr ja nid) iigladä wordä. So simr mit ihnä i sone chliini Bar, wo Jedä Jedä kennt. Sehr amüsant gsi u o hie sisi widr sehr offä u hei mit üs gret. Mir müessä unbedingt Spanisch lehrä heimr gmerkt...
Bim Zrugggah heimr no tierischi Begleitig gha, äs grosses unes chliises Büsi (liebevou Burrito gnennt vo üs). Härzigi Gschöpfli!
Morn göhmr uf Santiago de Compostela.Read more