Ngorongoro & Lake Manyara

Richtig Ngorongoro isches immer grüener worde. Zum Kraterrand ueche fahrtme dürne Dschnugu und obe ahcho hetme e atemberoubendi Ussicht i Krater ine. 600 Meter geids abe und dr Durchmesser isch bis zu 21km. Mir hei obe e chliini Wanderig mit dere spektakuläre Ussicht gmacht und si när zu üsem Camp gfahre. Ufem wäg simer no are Gruppe sitzende Giraffe begägnet. Z Camp isch stark am Wind usgsetzt gsi und d Nacht nid sonderlech erhousam. Bi bewölktem Wätter und eher früsche Temperatur simer näre e morge lang im Krater umegfahre. Bekannt für sini Nashörner simer mehrmaus dür z Waldstück gfahre wo si sech verstecke, aber leider heimer keni chönne entdecke. Meh cha nid immer Glück ha. Mir hei aber drfür 2 grossi männlechi Löie gseh wo zäme mitemne wiibli si ungerwägs gsi. Si si eue gad vom Frässe cho wüu hinger ihne si no Schakale und Hyäne gsi, di sogenannti Putzequipe. Nachemne Namittag am Pool simer näre am Tag druf no i Lake Manyara Nationalpark. Dert heimer zersch e Treetop Walk gmacht. Uf fasch 20 Meter simer düre Urwaud gloffe. Ufem Gamedrive näre heimer vorauem Affe und Elefante gseh. Leider isch o bi däm See e grosse Berich rundume überfluetet worde ide letzte Jahr. Drum hets dütlech weniger Tier und oh d Löie gsehtme immer säutener. Trotzdem isch d Natur sehr ihdrücklech gsi. Izze simer zrügg in Arusha und üsi Safaritäg si düre. Einersiits simer froh mau chli uszruie und usschlafe. Angerersiits fingemers o chli schad chöimer nid no meh Tier gah entdecke.Read more