Mafia Island

Nachem Terminal 2 ( das mit de Inlandflüg) heimer no Terminal 1 dörfe kennelehre. Hie flüge nur ganz chliini Flugzüg ab. Üses het inkl Pilote 14 Plätz. Pilot hets aber nume eine gha (wo zum Glück immerhin für Start und Landig sis Handy no het wäggleit). Vom Flugi us heimer Walhaie gseh und d Landig isch dütlech sanfter gsi aus bi jedere grosse Maschine. Im Hotel simer fründlech empfange worde und hei direkt agfange dr Strand z gniesse. Di folgende Täg heimers am Strand und ir Hängematte gmüetlech gno und immer wider chlini Usflüg gmacht. Einisch e Buckelwal Tour, wo d Buckelwale leider nid hei wöue vrbicho, drfür d Rägewolke. Einisch chli dürs Dorf gspaziert und dert fein ga ässe. Dr Marc isch einisch am morge mit Walhaie gah schnorchle. Nachem churze orientiere im Wasser isch plötzlech ä 6 Meter länge Fisch ungerdüregschwumme. Obwou dases nach gar nüt usgseht muesme rächt Gas gäh dene nachezmöge. Am Tag druf bim Touche heter näre de die chliinere Fische vo nach gseh. Krokodilfisch, riisigi Muräne, Pufferfish, Roche, Skorpionfisch und aus Highlight e Baby Boxfish (öppe 5cm läng). Zudäm natürlech no ganz viu angeri Fische und ei Schildkröte wo ade Koralle isch am Knabbere gsi. Am letzte Tag simer no zure Sandbank gfahre, vordranne heimer gschnorchlet und näre uf dr Sandbank Zmittag gässe. Nach 6 sehr erholsame Täg simer hüt zrügg uf Dar gfloge und morn geits de via Doha uf Züri. Czytaj więcej