Tag 45 - Mount Bromo 🌋

Am 20 vor 4 het denn scho wieder de Wecker glütet… schnell ahgleit und Rucksack packt simmer au scho pünktlich am 4i mit em Jeep losgfahre.

Öpe 40min hemmer gha bis mer bim Kingkonghill ahcho sind. Da het sich würkli ein Jeep an andere greit.. und das trotz Regeziit. Mir wennd gar nöd wüsse wie s da usgseht ih de Hauptsaison! 🙈
Vo det us simmer denn na öpe 10min ufegloffe. Dobe hemmer eus zerscht en warme Tee gönnt und sind denn nachher führe go de Sunneufgang luege.

Leider hemmer ziemli Pech gha mit em Wetter.. es isch mega neblig und bewölkt gsi. Spöter hets denn zum Glück glich na uftah, aber die schön Ussicht wie uf de Bilder wo mer vorher gseh hend, hemmer leider nöd gha.

Öpe am 6i simmer wieder zrugg zum Jeep gloffe und sind denn zum Bromo Startpunkt gfahre.
De Vulkan isch nur ca 2.300m höch und so simmer nur ca. 30min gloffe bis mer am Kraterrand gstande sind. D Ussicht isch trotz Nebel vo da schön gsi und het sich für eus trotzdem glohnt ☺️🌋

Leider hets da uh viel armi Ross gha, wo die fuule Touris für es bizli Geld ufe und abetreit hend..😕 Hemmer natürlich nöd gmacht.

Wieder dune ahcho simmer wieder zrugg zum Homestay gfahre worde.
Det simmer denn zerscht mal go zmorge esse. Nachher hemmer eusi Sache zemepackt und hend eus es Gojek (Taxi) richtig Probolinggo bstellt (öppe 1.5h Fahrt). Vo det us simmer 4h mit em Zug uf Banyuwangi Ketapang gfahre.

In Ketapang ahcho simmer direkt is Hotel.
Mir hend eus da e chli es bessers Hotel gönnt und hend eus richtig druf gfreut ☺️

Endlich mal wieder...
...alles wo funktioniert.
...es normals WC.
...kei verschimmleti Duschi.
...es Zimmer wo nöd stinkt.
...warms Wasser.
...es suubers Bett.
...oises Züg tröchne und wäsche.
...es Zimmer ohni Insekte.
...es ruhigs Zimmer.

Spöter hemmer eus denn na en Roller gmietet (CHF 4.50 pro Tag) und sind na eusi mittlerwile richtig übel stinkendi Wösch go abgeh (leider hemmer nüt gfunde zum selber wäsche.. bim abgeh hemmer eus aso scho recht gschämt 🤢🤮😅🙈).

Am Abig hemmer da im Hotel Znacht gesse.
Eigentlich hemmer denkt am Buffet chömer da mal s lokale Esse chli usprobiere. Aber leider het eus s Esse da bis jetzt gar nöd überzügt.. sehr viel Fett und alles mögliche wird frittiert 🙈 aber vlt finde mer ih de nächschte Täg na chli öpis bessers, gsünders ☺️

Dankbarkeit...
Für ois mal wieder en sehr iischniidendi und wertvolli Erfahrig, wo mer hend dörfe sammle. Mer sind eifach nur dankbar.

Dankbar, was mir alles hend und als selbstverständlich erachted...
Wie guet mir s eich dehei hend und was mir eich für es riise Privileg und Glück hend, dass mer i de Schwiiz gebore sind. 🙏🏽Læs mere