Tag 73 + 74 - Gym und Surfe Kuta, Lombok

Nach geschter hemmer für de hütig Tag nöd viel plant.

Am morge simmer is Fitness und am Nami simmer denn uf en Ussichtspunkt ufegloffe. D Ussicht isch mega schön gsi, aber wils so heiss gsi isch, hemmer s nöd lang usghalte und sind nach paar Minute wieder zrugg 🥵
Aber mer wennd eus nöd beschwere, schliesslich freue mer eus über d Sunne! ☀️

Mit eusem Hotel da simmer leider gar nöd z friede.. s Zimmer für sich wär eigentlich ganz guet (abgseh devo, dass es mega modrig schmöckt..), aber sie sind da grad s ganze Huus am umbaue und s isch abgseh vo vier Zimmer eich e reini Baustell 🙈 die Info hends eus natürlich nöd wiitergeh bim bueche 😅
Au hends letscht Nacht s Gfühl gha sie münd bis am 12i ih de Nacht na irgendöpis bohre.. bis de Janis denn mal ufgstande isch und öpis gseit het…

Dezue chunt, dass es nebe dra grad e Moschee het und mer jede morge am 5i vo ihrem Gebetsgsang für eh halb stund gweckt werded 🫠

---

Am nächschte Tag hemmer eus endlich mal e Surfstund buecht. Da mer beidi Ahfänger sind, simmer mit eusem Surflehrer zumene Spot gfahre, wo mer vom Strand hend chöne inelaufe und s nöd all zu grossi Welle gha het.

Nachere churze Erchlärig am Strand, wie mer uf s Brett ufstaht, isch es denn au scho is Wasser gange.
Nöd lang isch es gange und mir hend scho eusi erschte Welle chöne stah 🥳
Euse Guide het eus zwar ghulfe und immer gseit wenn mer münd ufstah, aber trotzdem isch es es cools Gfühl gsi wenn mer s gschafft hend druf stah z bliebe 🙈
Leider simmer denn nach öpe ere Stund scho wieder fertig gsi, da d Welle nüm so guet gsi sind.. eigentlich hete mer für zwei Stund im Wasser buecht gha 🤷‍♀️🤷‍♂️

Biz enttüscht simmer drum nachher scho gsi, wil mer de volli Priis zahlt gha hend.. aber Spass hets trotzdem gmacht! 🏄‍♀️🏄‍♂️☺️
Mer wennd uf jede Fall wieder gah, au wenn mer eus e anderi Surfschuel würded ussueche.Read more