Dä letschti Schluck

Mit emne guete Zmorge im Hostel hemmr üs ufe Weg gmacht is Clementinum zude Nationalbibliothek und em Astronomieturm.
D'Füehrig hed ersch am Eis agfange drum simmer no es Altststadtründeli go dreiä und hend i de eint und ander Lade inegügsled. Sogar e Victorinox Store heds gah und mier Bünzlis hend ded müesse ine zum am nächschte Daherglaufene go sege dass uf dem Bild "d'Mythe" und nid "d'Müthe" abbilded sind. De Perislav oder so ähnlich hed üs sehr interessiert zueglost demit er sine Chunde das au wiitersege chan. 😄
Spöter hemmr nid schlächt gstuunt wo mier i diä Bibliothekshalle mit meh als 27'000 Büecher gwundrig inegluegt hend. Ufem Astronomieturm hemmr 360° Rundumsicht gnosse und erfahre wiä sie früehner midemne Liächtstrahl ufem Bode im abdunklete Ruum diä gnaui Uhrziit gwüsst hend und so zum Zmittag d'Fahne ghisst.
Mier hend au Zmittagsfahne ghisst und sind ines Bistro ade Moldau und hend sletschte Mal d'Sicht zude Prager Burg beguetachted. En Espresso Tonic hemmr üs gegönnt bevor mier üses Gepäck denn gholt hend und überpünktlich a Flughafe sind. S'letschte Pilsner Urquell und denn ab i Flüger uf Züri.

Es isch e herrlich süffige Usflug gsi uf Prag mit vill verschiednigem Esse, mittelalterlichem Scharm und nid z'vergesse das guete Bier mit es bizli zvill Schuum.
Proscht und bis zum nechschte Mal!
Üchi bierige Reisefüdlis 🙋🏼‍♂️Læs mere