2. Tag, weniger schmärzvou aus erwartet

Hüt isch toll gsi!
Am Morge mau widr im Hotel gässä, hami nid getrout vom ganze Buffet es Foto zmache, drum nur mini Uswauh ufem Täuer (es isch tatsächlech feiner auses usgseht).
Nachem Zmorge bini ner direkt mitem Trämmli id Stadt gfahre wüu: Hüt hani am 11:00 eh Tattootermin abgmacht😁
Ig bi uh mega nervös gsi! Ig ha am Studio im vorus scho gschribe, ds si eh Designidee vo mir chöi in rueh plane und umsetzä. Ha de ouno gschribe bi welem artist dsis mr chönnt vorsteue und guet isch.
Woni ize derte hocke, schicki sones AGB-Dok ab, damit si ihri Haftig chöi usschliesse etc. obwouh mr chli mulmig isch gsi, wüu ig ds ahgäbleche Gspräch über Risike etc. mitem Artist gar nid gha ha (de ig ja nonidemau gseh ha ih dem Moment). Jänu hani denkt, ds Studio isch ufem Internet guet bewärtet und öbber woni pers. kenne hets mr ou empfohle, de chas nid sone Sach sii.
Nachdem ds abgschickt isch, chunt de mini Tattowiererin füre, mir ds Design cho zeige, wosi gmacht het und ig wirde zzwöite mau chli stuzig, wüu si nid eine vo denä Artists isch, woni ahgäh ha xD abr fr öbbis hani ja bir Ahmäudig gseit si chöimer die Person gäh, wosi zgfüu hei eigni sich am bestä frs Tattoo ih dem Stiu wonis ha wöue.
Ig luege auso ds Design ah und bi würk direkt verliebt, ha abr glich no es paar Ahpassigä, woni ar Tattowiererin sägä und während si die Sächeli ahpasst, checki sä uf Insta us, was si scho so fr Büetz gmacht het.
Wie erwartet gseht aues guet uus, si het zwar 1-2 Biuder gstoche, womi nid so überzügt hei abr ha denkt si wird ds bi mir sichr guet machä.
Si chunt zrügg mitem ahpasste Design, ig ha nomau Änderigswünsch und nachdem luegemer ih wellere Grössi und womers gnau härätüe. Has scho vo Ahfang ah ufem Trizeps wöue, gnau ischs ize ufem ungere Trizeps glandet😁
Ig weiss no, bevor si ahgfange het und ig scho ufem Tisch bi glägä hani mis Härz mega gspührt schlah, bi so ufgregt gsii! Und ner wosi ahgfange het stäche, hani dänkt: Wart ds isches?
Es het würk eich fasch nid wehtah. Es het scho Orte gäh wo mau weniger, mau meh gschmärzt hei, abr all in all mega chillig! Und dTattowiererin isch sehr härzig gsii, het immer widr gfragt öbs geit und öbi Pouse bruche etc. (Emu nachdem si gfragt und checkt het, ds ds mis erstä Tattoo isch, vorher hettsi eue denkt was fragt de fr dummi Sache xD).
Und ds Resultat? Ig fröie mi mega!😍🥰 Es isch es hennä schöns Tattoo, woni zgfüu ha dses sehr zu mir passt und ig fröie mi mega ds uf mir zha!! Ig zeiges öich de aune gärn mau IRL, auso in ächt, wenni widr zrügg bi😁
Nachem Tattoo bini fein asiatisch go ässä und ih sones Alchemiemuseum, wo ouno spannend isch gsii. Ha nid no meh gmacht, wüu ds Tattoo lenger gange isch aus antizipiert (mit consultation etc. öbbe 3h) abr dsch vo Ahfang ah eich so planet gsii😁
Nachem Museum bini no im Ribs of Prague gsii und ner hei go läsä. Aues ih auem eh supererfougriichä Tag!Read more