Las Peñitas

Mir si sit paar Täg in Las Peñitas. Dä Ort isch vorauem bekannt fürs Surfe. Üses Hostel isch direkt am Meer gsi, perfekti Lag, perfekti Sicht, perfekte Vibe! Wo mir si ahcho hei mir zwar grad nid so viu gmerkt vo däm „perfekte Vibe“, wöu mir öpe ä Tag Stromusfau hei gha u de ständig dä lärmig Generator isch glüffe..wo äbe dä guet Vibe zersch chli het zerstört😅😂

Mir hei das Hostel abr wäge däm nid wöue abschribä u heis när würkli sehr schön gha und hei hiä paar gueti Lüt troffe odr ou wieder troffe vo vorherige Hostel😊 Es isch immer wieder spannend wie viu die glichi Reiseroute hei und mä cha sech so guet ustuusche und macht ab für sech när irgendwo irgendwenn im nä angere Land wieder z treffe😊

Es isch üs scho meh ufgfaue, vorauem hiä sehr bewusst worde, wie viu Froue eigentlech ungerwegs si und reise (i dä meischte Fäll ou allei) - viu meh aus Manne. Mir hei üs ou Gedanke gmacht wieso das so isch, abr ufene bstimmti Begründig si mir nid gstosse.

Uf jede Fau hei mir ussert Surfe, id Yoga Klass ga, Bade, Schnörrä u es Bierli trinke nid viu meh gmacht 😂🙌🏼Read more