León

Mir hei üse letscht Tag in Nicaragua in León (gründig 1524) verbracht. Es isch sehr ä interessanti Stadt und bekannt aus Stadt der Literatur, Poete und Kunst. Der berüehmt Dichter Rubén Dario het si Wohnsitz in León gha.

Zersch si mir d Kathedrale vo León ga aluege. Si isch wunderschön und die gröschti vo Zentralamerika. Usse wie inne isch si ganz wiis. Mir hei sä inne und ou uf z Dach chönne ga aluege und dert si mir praktisch für üs allei gsi u hei Fotoshooting gmacht🤣 🙌🏼

När simer no dür d Strasse glüffe u si d Stadt ga erkunde. Hei no schöni Graffitis gfunge, wo ou mit der ganze Gschicht vom Land verbunge si.

Am spätere Namitag hei mir no ä Free Walking Tour dür d Stadt gmacht mitem nä Guide. Er het üs diversi Orte & Denkmal zeigt und viu über d Gschicht vor Stadt und ou über d Gschicht vo Nicaragua verzeut. Es isch scho bedenklech wie korrupt das hiä isch und abr d Lüt trotzdem z gfüehl hei es steckt ä guet funktionierendi Demokratie drhinger. Abr das isch grundsätzlech nüt neus gsi für üs, wöu üs das während der Reis dür Nicaragua entweder scho isch ufgfaue odr üs d’Lüt hei verzeut wie das so louft da. Es isch nume erschreckend gsi z ghöre vom Guide, wie fescht korrupt dases isch ahand vo paarne Beispiel. 😬
Was abr ou trurig isch, dass mä eifach ou z gfühel het becho, dass d‘Regierig absichtlech zweni macht für d Lüt; viu zweni Schuelplätz/Usbildigsmüglechkeite, schlächti Infrastruktur, schlächti medizinischi Versorgig und drzue chunnt es git i däm Land kener Zitige - dämentsprächend isch ou dr Informationsfluss!

Trotzdem isches es schöns Land mitere grosse Gschicht, viunä nätte und intellektuelle Lüt, mit schöne Plätzli zum verwilä und mit viuu Potential! 🌸☀️⛱️🐠Read more