Cozumel 🇲🇽

D Insle Cozumel isch vo Playa del Carmen erreichbar und mir si dert houptsächlech am Touche gsi 😄

Mir hei dert ä Touchkurs gmacht rund ums Thema Koralle Conservation (PADI Coral Reef Conservation Specialty). Dert hei mir viu über Koralle glehrt und schlussendlich hei mir ou dörfe die Koralle ga putze 🪥🧽 aso putze heisst, mir hei d’Koralle wo sie dert bi däm Riff „ahpflanzt“ hei mit div. Bürschteli befreit vo Algen, Sand und allerlei Dräck. Gwüssi Arten vo Algen si nid guet für d Korallen und wuchere die Tierli regurecht ih (genau richtig gläse, für die wos nid wüsse, Korallen si eigentlech sensibli Tierli und nid eifach ä Stei). Und ja für das leit mä ou wieder z’Touchequipment ah und duet när während am Touchgang putze😄 Das isch im Prinzip wie wemä im Garte duet jätä😂 Die Algen wachse zum Teil 1 cm pro Tag, während je nach Korallenart durchschnittlech nume 1 cm Wachstum pro Jahr z‘erwarte isch❗️Totals Missverhältnis.

Es isch verruckt und sehr trurig gsi was mir vo üsem Instructor am German Mendez hei müesse ghöre wie schlecht dases üsnä no verblibne Riff geit. Er isch Biolog, läbt sit fasch 40 Jahr uf dere Insle und leitet dä Kurs und gwüssi Forschigsprojekt dert mit Leib und Seel. Er het gseit, dass ca. 80-90% vom Riff verschwunde isch sit er z’erschte Mau uf dere Insle isch gsi.
Es isch erschreckend wemä dänkt dass d‘Koralle für unzähligi Meeresläbeswäse es Daheime isch, dert Ungerschlupf und Fuetter finge und sehr wichtig si für d‘Diversität vo aune Arten. Kener Riff - kener Fischlis.

Doch was beschleunigt z Korallesterbe/Coral Bleaching in Cozumel;
☝🏼Kreuzfahrtschiff
☝🏼Massetourismus; (Toucherschnupperlis wo unerfahre si, umeschwadere u Koralle abbräche plus tonnenweise Sonnecreme ahschmiere) - ir Hochsaison fahre bis zu 7 Kreuzfahrtschiff pro Tag mit ca. 40‘000 Lüt uf die Insle. Viu vo dene Lüt wei ga touche und de wärde die Gruppenwiis zu dä Riff gfüehrt, damit si ihrer Discovery Dives chöi mache
☝🏼generelli Klimaerwährmig; z‘Wasser wo geng wie wärmer wird stresst d Koralle und beschleunigt z‘Wachstum vo dä schädleche Algenarten

Ja so zämefassend und us der Sicht vom nä leideschaftleche Toucher mues mä scho säge, es gseht im Moment nid so guet us für üsi Riff 😕Read more