Minca 🇨🇴

Minca (ca. 600müM) isch ganz es chlises, härzigs Dörfli wome ir nechi vo Santa Marta (17km entfernt) fingt. Z‘spezielle dran isch, es isch voukomme im Grüenä, es het nume Waud und mä gseht vo dert uf z karibische Meer und uf z‘Städtli Santa Marta abe. Es isch es Dörfli im höchschte Küstengebirge vor Welt - der Sierra Nevada. 🙌🏼

Am einte Morge si mir früäch ufgstange und hei ä Bird Watching Tour gmacht. De si mir am 6si mit Töffe abghout worde und si so dürlüftet i Tag gstartet 😅 Isch sehr spannend gsi, hei sehr viu Tucan und anderi farbigi Vögeli gseh und hei abr am meischte di Rueh vom Morge gnosse.

A dä angere Täg hei mir „chlini“ Wanderige i dene schöne Wälder gmacht und si paar mau so richtig verschiffet worde da Rägezit isch unds immer zwüsche 2 u 3 am Nami ahfaht rägne. Abr de vougas wie us Chüblä 😅
Churzi Chlammerbemerkig; Mir hei während dere Reis usegfunge, dass Wandere sehr ä wiite Begriff cha si. Wandere isch für üs Schwizer wemä id Bärge geit, es paar Höhemeter macht, Wanderwägli het und zum Teil unwegsams Gländ überquert. Wandere hiä isch zum Teil für üs übersetzt ä Spaziergang, wome chli gradus mues loufe und mängisch es Högerli chunnt)🙌🏼😂

Ä Kafifinca simer ou no ga aluege und si natürli dr fein, kolumbianisch Kafi ga probiere. Minca ghört no nid zur typische Kafiregion, aber es isch drfür klein aber fein und öpis exklusivs us der Region gsi. ☕️Read more