Tag 4: Inka Trail zum Machu Picchu 🇵🇪

Wie scho erwähnt si mir früäch ufgstange (3:30am) wäge dä Porters. Mir hätte abr im Prinzip no lang nid uf müesse, wöu mir hei när bim Campingplatz bis am 5:15 müesse warte bis mir hei chönne loswandere😌 jaja, die Zit bim warte isch äuä o nume für üs zwöi schnäu düre gange.. mir sinis z‘warte gwohnt (reise ja o nid grad ersch sit geschter😜) und mir hei nüt angers gwüsst aus chli Schwizer Musig la loufe (Patent Ochsner, Stubete Gäng) u drzue chli mitsinge u tanze 🙈🤪 di angere hei sech äuä chli gfragt, was iz äch scho wieder mit dene Schwizer nid stimmt, abr die si sech so Energieahfäll u dumm schnurre vo üs afä gwohnt gsi 😂
Item, uf jede Fau isch dä chliin letscht Teil vor Wanderig losgange bis zum Sun Gate. Bis dert sis ca. nume no 1.5 Stung Wanderig gsi. Vo däm Sun Gate us hei mir de ou scho die erschti Sicht gha ufe Machu Picchu 🙌🏼 Wo mir bim Sun Gate si ahcho isch no aus im Näbu gsi, abr nach ca. 5 Min. ischer langsam verschwunde und mir hei wunderschöni erschti Ihdrück becho!

Vom Sun Gate us hei mir öpe no mau 20 Min. gha bis mir du schlussendlich bim Machu Picchu si gsi. Dert ahcho hei mir aui mega freud gha und si usem stuune nüme usecho! Es hetsech auso glohnt dä Weg uf sech z nä und mir müesse säge, es isch ä schöne Ort zum gseh und würkli sehr ihdrücklech was die Inkas fürnes Riich hei ufbout! 😌
Was haut chli müäsam isch gsi, dert bim Machu Picchu säuber si mir wieder uf die ganze Tourischtemassene gstosse, wo mir die vorherige Täg zimmli rueh hei gha drvo. Abr ja es isch so wis isch, mä mues dä Inka Trail nid mache, mä cha o eifach ä Tagestour zum Machu Picchu bueche und nä so ga ahluege. Für üs isch ganz klar der Trail und die paar Täg mit dere Gruppe vo Lüt öpis sehr bsungrigs gsi und mir heis wäuts luschtig gha und vorauem gsellig u guet ungerenang. Mir dänke, dass das genau dä Punkt isch wo die ganzi Tour het usgmacht u für üs zu öpisem Bsungrigem het gmacht u mir jedem würde empfähle dä Trail z‘mache und wo o mir säuber no mau würde ga😄🙌🏼Read more