Puno & Titicacasee 🇵🇪

Nach Cusco si mir witers uf Puno wo mit sine 3’812m no höcher gläge isch aus Cusco. Puno isch ä chlineri Stadt am Lago Titicaca. Dä See isch eine vo dä gröschte in Südamerika und zugleich z‘höchschte beschiffbare Gwässer vor Wäut😅 Der See ligt ar Grenze vo Peru und Bolivien. Er isch a dä meischte Orte nid sehr töif und misst ar töifschte Stell 107m.
In Puno hei mir ä Usflug gmacht zu dä Uro-Aimara Familie. Das isch das Volk wo dert uf dene Insle wohnt, wo für üs usgseh wie us Stroh gmacht. Abr die Insle bestöh usere spezielle Schilfart (Totora Schilf) wo dert am See wachst. Us däm Schilfrohr wärde scho sit Jahrhunderte d‘Insle boue und ou etlechi angeri Sache wie z.B. ihri bekannte gelbe Boot. Die Insle sie ursprünglech usem Grund bout worde, damit d‘Uros sich ufem See vor Feinde cha schütze.

Mir hei ou no ä witeri Insle bsuecht ufem See und zwar Taquile Island. Üs het die Insle sehr gfalle, obwohl alles so trochen schiint, isches glich uf sini Art und Wiis wunderschön und bsungrig gsi. Mir hei ou dr Ihdruck gha, dass augemein z‘Rad uf dere Insle chli langsamer und ruhiger dräht und d‘Lüt hei sehr z‘fride gwürkt. Si hei üs vo ihrne Brüch und vo ihrne Wundermitteli verzeut. Z.B. je nach dem was fürne Chappe d‘Manne anne hei zeigts, ob eine single odr verhüratet isch. Und gstrickt wärde de die nid öpe vo dä Froue, nei das mache usschliesslech d’Manne, d‘Froue tüä weben. U we d‘Manne ä Frou gfunge hei und die möchte hürate, müesse si zersch ä Chappe stricke, wo am nä praktische Tescht vom zuekünftige Schwiegervater mues Stand halte. Und zwar wird die Chappe so guet und gnau gstrikt si, dass wemä Wasser id Chappe füllt, z‘Wasser nid so schnäu söt dürefliesse. Und wes äbe de z‘schnäu fliesst, heisst das füre Schwiegervater, dasch schlächti Büetz und dä isch zweni guet für mini Tochter.
Er wo üs das alles het vorgfüehrt, het dennzumal ä schlächti erschti Chappe gmacht und het abr de no mau eini dörfe mache u da heter 9 Mönet gha - di zweiti Chappe het ömu am Tescht vom Schwiegervater Stand ghalte und er het du när dörfe sini Tochter hürate 🙌🏼

D‘Lüt uf dere Insle wärde sehr alt. Si hei sehr viu säubergmachti Husmitteli wie z.B. Shampoo usere Pflanze, wo gmäss ihne macht das mä kener graui Haar bechunnt - mir hei tatsächlech o niämer mit graue Haar gseh (villech heisi diä ja versteckt 🤷🏼‍♀️)
Uf jede fau heisi o viu Bewegig und müesse aus z‘Fuess mache wöus kener Outo git dert und uf ca. 4‘000m isch das sowiso o geng grad chli Höhetraining😅Read more