Colca Canyon 2 Days Hike 🇵🇪

Vo Arequipa us hei mir d‘Colca Canyon Wanderig gmacht wo 2 Täg inkl. 1 Übernachtig isch gange. Die Schlucht isch stellenwiis fasch dopplet so töif wie der Grand Canyon z‘Amerika und mit däm Fact wird natürli o gworbe😉 Der Canyon isch ca. 3300m töif und gilt somit als eini vo de töifschte Schluchte vor Welt.
Zugleich isches ou z‘Dahei vo zahlriiche Andenkondore. Die majestätische Tier hei ä Flüguspannwiiti vo 2.6 bis zu 3.2m und gelte i dä Andenkulture aus heiligi Wesen.
Mir si ir Trochenzit ir Colca Schlucht gsi und wäge däm gseht aus ou sehr brun/gelb und trochen us. Sobau d‘Rägezit ahfaht wird das Land wunderschön grüen. 🌦️

Am erschte Tag am Morge hei mir paar Ussichtsplattforme bsuecht und eini isch bsungrigs schön gsi, nämlech die wome die Andenkondore het chönne beobachte. Si si zwar nid sehr nach gsi, abr trotzdem het mä sä sehr guet gseh flüge wäge ihrere Flüguspannwiti. Mir hei Glück gha u hei grad 5 Tier uf z‘mau gseh🙌🏼
Und när hei mir d‘Wanderig abe i die Schlucht in Ahgriff gno. Es isch relativ steil gsi und ou rütschig zum loufe da es so viu loses Gstei het gha, aso mir si froh gsi hei mir bire Peruanerin bim nä Lädeli no sone Houzstock chönne choufe 😅 Es isch rund 1200m abe gange i die Schlucht. Am Schluss vom Tag simer ganz unger ire chliine Oase glandet im Ort Sangalle. Es isch no faszinierend gsi, wie grüen dases dert isch und süsch aus drumherum so trochen. Abr isch o klar, die luege ou guet zu dere Oase - natürli isches ou meh grüen im Tal wöu no ä Fluss dürefliesst.

Am nächschte Morge simer ca. am 5fi losglüffe und si 2 Stung später ganz obe wieder ahcho - hei aso a däm Morge wieder 1‘200 Höhenmeter ufwärts gmacht. U das de no ohni z‘Morge, das hets de ersch nachem Ufstieg gä😄🙌🏼
Im Verlouf vom Tag si mir no witeri Ussichtspünkt ga ahluege (eine isch uf 4‘900m gsi) und bire heisse Quelle si mir no bade. Zum Schluss hei mir no bire Alpaka Herde ahghalte 🙌🏼🦙Read more