Arequipa 🇵🇪

Mir si chli obe abe cho us dä höche Regione u zwar simer witersgreist uf Arequipa. Die Stadt isch bekannt aus „White City“ wöu viu Gebäude us wissem Vulkangstei si boue worde. Die Stadt ligt nämlech mits im nä Vulkangebiet und isch vo 3 Vulkän umgä. Z‘Ushängeschild vor Region isch der Vulkan El Misti. Das isch ä aktive Vulkan und d‘Forscher rechnä drmit, dass dä gli wieder mau cha usbräche. Dr letscht grösser Usbruch isch im Jahr 1784 gsi. Trotzdäm dass die Usbruchsgfahr jederzit da isch, wärde neui Siedlige ir Nechi vom Vulkan boue, wöu d‘Lüt luege dä Vulkan aus schlafend ah. 🌋

In Arequipa si mir im Museo Santuarios Andinos ga d‘Juanita bsueche. Das isch die berühmti Mumie wo im ewige Eis am Ampato Vulkan im Jahr 1995 isch gfunge worde. D‘Juanita isch ä mönschlechi Opfergab gsi vo dä Inkas. Das Meitschi isch gsung gsi, ca. 140cm gross, schlank, rund 14 jährig und isch ahgäblech ihres ganze läbelang uf die Opfergab vorbereitet worde. Es isch eine vo dä bedütenschte Funde gsi vo dä amerikanische Kontinente.
I däm Museum isch d‘Juanita usgstellt, genau so i dere Form wie mä sä het gfunge. Dank däm das si so lang im Eis isch gsi, isch ihre Körper nid uströchnet und sehr guet konserviert blibe. Nume ihre Chopf het es Zitli usem Eis usegluegt und isch ou dr Grund wörum si überhoupt gfunge isch worde.

Todesursach isch natürli ou spannend gsi. D‘Inkas hei das Meitschi zersch unger Droge gsetzt und hei när mitem nä feschte Schlag gäge die rechti Schläfe ihres Läbe beändet. Mä gsehts guet we mä sä ahluegt, dass uf ihrere rechte Site vom Chopf ä Fraktur isch. Es isch für üs faszinierend gsi die Mumie chönne z’betrachte, o we üs ihres Schicksal sehr leid het ta. Mä erkennt ihrer Gsichtszüg und es si no aui Zäng vorhande. Leider hei mir nid dörfe Fötelä im Museum, abr mir hei drfür es Beispielbild ufeglade. Si wird witerhin im starch küehlte Chaschte konserviert.

Üs het die Stadt sehr gfaue und si het würkli ä gwüsse Charme und isch ou fescht prägt worde vo dä Spanische Kolonien.Read more