Unvergessliches Silvester 2020

Nochemene usgebige Shopping Marathon i dene onzählige Malls - okey zuegäh, för 3/4 vo de Läde hed eus schlicht s nötige Chligäld gfählt - wo mer au omegluegt hed, alles Luxusmarkene - hemmer eus langsam för de New Year's Eve ready gmacht.

Imene noble Restaurant diräkt ade bekannte Orchard Road hemmers eus bimene leckere Dinner ond enere feine Fläsche Wii lo guet go lo. Typisch das usgrächnet zwoi Tisch näb eus au no grad es schwiizer Pärli hockt, wo mer vorhäne doch no gar kei Schwiizer ghört hend - d Wält esch sehr Chli!

Liecht beschwipst ond nochere lostige Taxifahrt hemmer eus denn is Getümmel ade Marina Bay gwogt om en ideale Blick ufs Füürwärk zergattere. Bereits scho einigi Minutene vorem Countdown hends es ordentlech lo tschädere ond öberall esch Usnahmezuestand gseh!. S Highlight esch onderanderem en grandiosi Drohneshow gseh - wiener au uf de Videos gsänd - ächt craaazy! De obligat Minute-Countdown hends denn au usgebig zelebriert ond Ponkt 00.00 hends medemene bombastische Füürwärk s neue Johr iglütet! Ergendwie lostig eifach so 7h vor de Schwiiz bereits im neue Johr zsi! Silväster in Singapore hed also ghalte wases versproche hed, bi 30 Grad, chorze Hose ond inere riese Mönschemängi werd eus de Johresöbergang 2020 secher no lang in Erennerig blibe!

A dere Stell au allne ide Schwiiz wo jo no im alte Johr send etzt scho en füechtfröhleche Obig ond es HAPPY NEW YEAR 2020.Lue lisää