Noosa Heads & Noosa National Park

22 gennaio 2020, Australia ⋅ ⛅ 30 °C

Eusi wiiteri Reis hed eus noch Noosa gfüehrt. Es bekannts Dörfli nördlech vode Sunshine Coast. Do mer medem Wätter wiiterhin Glöck hend hemmer de ganzi ersti Tag am schöne Strand verbrocht. Einisch me esches en Zangegebort gseh, bis mer öberhaupt mol en passende Parkplatz för euse Camper gfonde hend. Glöcklech ond ide Hoffnig weder medere Buess verschont zbliibe hemmer denn gmüetlech de Tag döre eusi Ränze brüned.

Wär ja zu schön gseh... leider hends dasmol weder kei verbarme gha ond eus med 66$ büesst. Grond: Euse Camper esch zgross gseh förs eigentleche Parkfäld. Na toll, wo zom Geier seled mer denn öberhaupt chönne legal parkiere med somene riese Auto?! Parkhüser geds leider au keis wo vode Höchi länge wörd. Er gsänd, mer gniessed zwar en ordentleche Comfort aber hend deför med so einige anderne Tückene zkämpfe.
Am Obe heds weder zemmli grägned gha, was noch dem heisse Tag för einisch grad rächt cho esch.

Nochere schwetzige Nacht semmer am Tag 2 scho früeh uf ond via Uber (dass mer au secher kei Buess ifanged!) rechtig Noosa Nationalpark. Ufem Programm esch en schöne Walk ade Köste entlang rechtig Sunshine Beach gstande. Guet icremet ond medemene ghörige Wasservorrat esches denn Los gange. Bereits am Afang hed eus en Koala ufem Baum begrüesst ond chrozi Ziit spöter hemmer d Delfine bem verbischwimme beobachtet. So toll die Tier au mol in freie Natur dörfe zerläbe. Es esch emmer heisser worde ond mer esch froh om jede Schatteabschnitt gseh. Trotzdem hend eus die traumhafte Blick uf die schöne Bochte ond Stränd voller Bestuhnig inezoge. Eigentlech wär die Wanderig med 2h agseid gseh aber bereits noch 1.5h semmer am Ziel acho - sehr zor Freud vode Yasmin. Als Belohnig hemmer eus denn en Abfröschig im Meer ordentlech verdient gha.

De Obig hemmer denn chle gnötzt, om die wiitere Stopps ond Campings usezsueche.
Morn gots wiiters uf Hervey Bay was denn au de Usgangsort för eusi Tagestour uf Fraser Island sie werd.

Mer freued eus also euch bald vo eusem negste Highlight(s) chönne zbrichte!Leggi altro