Jael Messerli

liebi lüt, häbet nech! mir hei öbbis z’verzeue... es wird ender es lengers gschichtli, aber i probieres so spannigsvou, detailriich u gfüäuhsächt z‘schribe wis ou isch gsi🤘🏻.

„es isch e schöne tag gsi wo d‘sara u d‘jael mitem outo d‘houptstrass vo uvita richtig corcovado gfahre si. d‘strass isch wunderbaar teeret u si fahre sehr aagnähm u entspannt. wosi de vor houptstrass drab si u emne schmelere wägli gfougt si ischs passiert...😳!“

nei ke seich, hie isch genau gar nüt passiert. aber chli hani nech scho i di passendi stimmig bracht - oder🤔?

auso, mir si abboge u lut der charte ere offizielle strass gfougt. di erste paar schlaaglöcher u hügle uf dem chisige wäg heimer no mit linggs gno u drüber glächlet u gseit „weisch wie, wenn das itz di ganze 25km so geit haha“. heimer ja no glück gha isches de schlussendlech nid so gsi - nume viu schlimmer🥴.

i wage z‘phoupte, dass no nie öbber vo öich so öbbis abartigs gfahre isch. ds isch wine achterbahn fahrt ohni schine oder wi e wiude ritt ohni sattu - oder wases o immer no für passendi vergliche git😧.

für dasder verstöht wiso i hie so usarte bim schribe - löts mi la erkläre:

d‘sara u d‘jael hei gmeint si heige es robusts outo mit 4rad aatrib gmietet - passend für d‘strasse hie. leider isch das nüt gsi... mir hei e outomat vo de toyota becho, mit chli vorderradaatrib u wo scho bi eim chli grössere stei bau dr buuch em bode aaschlaat. z’outo a sich fahrt uf teerete strasse guet, ke frag! nume schaad heimer vo dene keni me gha🚧.

wi gseit, schlaaglöcher si z‘einte gsi - mit kürvele u 5-10km/h heimer die chönne passiere. z’angere si vorauem d‘flüss, wo rächt höch si gsi u mer nume dank vorloufe vor sara (mit navigiere wo dases üs ni überfluetet) gmeisteret hei. natürlech darfme z’lob ad jael für z’subere fahre nid vergässe. riise hügle zmitzt ufder piste heimer o nume dank em „ufem buuch/bode drüber rütsche“ u viu vertroue uf d‘bräms überläbt (wi d‘grüschkulisse da derbi vom outo isch gsi - chasech öbbe jede vorsteue). ou di steile häng mit emne outomat uche z‘fahre si ni ganz ohne gsi. hesch aalouf gno, dass eigentlech ds outo mit schwung uche ma, het ds chäri aber leider gmeint er müässi schaute (im stutz!) u het natürlech ner ke energie me gha für uche. so si d reder unkontrollierbar düredrääit (üse puls übrigens ou) u mir si irgendwie im chiis schwümmend dr stutz z‘düruf cho⚠️.

der viert u letst fluss vorem ziu isch de z’höch fürnis gsi u so heimer z’outo abgsteut u si mit üsem gepäck dür z’wasser zu üsem hostel gwatschlet. heil aacho! happy end? leider nein. ds richtige problem chunt ersch no👉🏻...

u zwar heimer üs uf dere härefahrt gschwore de wäg nümme zrügg z‘gah - komme was wolle. üse plan wär eigentlech o ufgange, we üsi planti fähri würd outos lade oder we dr anger wäg ni no töiferi flüss hät... so simer zwunge gsi de weg ume zrügg z‘mache😵.

a sich denketer villech itze - hmmm dir sit ja ache cho, de chömeter o ume uche!wiso düäter itz so schwirig? hie paar gründ wo üsi eventuell chli negativ prägti oder nenne mers unsicheri gfüäuhslag begründe:

1. es isch räägeziit - wes bi üsere fahrt schiffet, de viu spass bim rütsche u blibe stecke🚜.

2. z‘ache ga isch eis - aber fahr mau löcher wo so töif si dases der d‘ungersiite vom outo verschriist ohni komplikatione e stutz z‘deruf wode eifach muesch gas gä🚨.

3. mir hei nid nume ke internet ungerwägs - mir hei o ke empfang📡.

da mir no absolut ke ahnig hei gha wie mer zrügg chöme und öbmer wärde blibe stecke oder ni u was z‘wätter zu üsem aabetür meint - simer für d‘unfauprävention sicherz’steue go e schuufle choufe für üse wäg frei z‘schufle🛠.

öbs üs glunge isch? das läseter im nächste text! spässli, da ig das hie grad cha schribe isch das es zeiche, dasmers überläbt hei. weder wöit wüsse wie, müässter no gad chli geduud im läse bewiise - has hüt grad niso mitem mi churtz fasse...

augemein zu üsem ufenthaut in corcovado chame säge, daser wi ou d’härefahrt chli e überraschig isch gsi. da der plant nationaupark 100$ pro person hät kostet u somit id kategorie „viu z’tüür“ gheit isch, simer de mit üsne pinke velöli hurti atz meer u de ä fluss go psueche womer üs dinn hei abküählet. e piña colada u paar spaziergäng hei üs no chli abwächslig bracht. viu meh hets ni z‘mache gä wöumer so ab vom schuss si gsi. aber het o guet da ume eis chli z‘ruhie🧘🏼‍♀️.

auso, itz chöme mer aber ume zum spannende teil - d‘rückfahrt🔙.

villech chami glich churtz u knapp fasse:

glich wi d‘härefahrt - nume schlimmer. mir hei gschuflet, mir hei gschwitzt, mir hei e schibewüscher verloore, u 3500 höhemeter trotz emne motorschade überwunde u si de nach über 10h fahre z’cartago aacho. 10h? jap, 10h🕙.

nach em schotterwägli heimer dänkt mir fahre nume no di sichere nationaustrasse. aber ume eis heimer müässe feststeue: schlimmer geht immer. di rästleche 7h heimer mit hinger lastwage nachefahre, seuber nid uche möge u haubstündige wartepouse wäg 5km bousteuene verbracht👷🏽‍♀️👷🏽‍♂️.

e grossi fröid i dem schlamassu hei üs de zum glück no e huufe aras bracht wo d’sara ufemne boum entdeckt het. u de hets gheisse: mir heis gschafft!!🦜

ja, me cha säge mir hei nis viu sorge gmacht - aber gloube di si o für zwe jungi froue zmitzt im dschungu begründet. üses outo isch leider tazächlech futsch - wird aber morn gottseidank vo europcar abghout und uustuscht. d’frag „i welem maas mir derfür verantwortlech si" het ou üs churz beschäftiget. trotzdem si mr de umständ entsprechend sorgfäutig gfahre und füehre dr schade ni uf üses verschuude zrugg. 😉 itz chöi mir drüber lache u hei viu nöii erfahrige gsammlet. u z‘beste a dem ganze: mir hei üsne ching/grossching de mau genau so aabetürlechi gschichte z‘verzeue wi üser eutere u üser grosseutere das üs geng tüä!!💚

jael - 22.08.19Read more