summerparadise!

nach üsem churtze ufenthaut z‘jacó, simer über quepos mitem chärii witer ache uf manuel antonio gfahre. z‘stedtli isch härzig chlii und um X kurve u höhemeter verteilt🏚.

gester u hüt heimer mit abstand di zwe wunderschönste u sunnigste täg bis itze verwütscht u jedi sekunde dervo gnosse. das chame natürlech em beste em strand mit viuu sünnele u bade i dem füdlilääie wasser🌸.

z‘erste mau i üsem läbe hei mir ds typische klischee vomne tropische strand erfüüut & mit emne röörli zure kokosnuss uustrunke - es isch soo fein gsi🥥.

zudem simer hüt am morge früä uuf (fängs normau, da mir eh geng um di 5i häu wach si) u i nationaupark vo manuel antonio gange. dört heimer d’natur bestuunt u bekanntschafte mit viune tier dörfe mache. fuutier heimer zwar schomau gseh, das hüt isch aber mit abstand üse liebling gsi! das, wöus so ungloublech e flache gring het gha u o süsch gar ni häu usgseh het, aber z‘läbe eifach gniesst u sech dür nüt usem konzept lat la bringe🧘🏼‍♀️.

zuesatzt wüsse vomne iiheimische📖:
heiter gwüsst dass fuutier nume us 4 gründ vom boum ache chöme?

1. we z‘wiibli schwanger isch us so cha gfährlechi stürtz vermiide👩🏼‍⚕️.

2. dass si gsundi mineralie usder ärde chöi ässe wosi ufem boum nid finde🍂.

3. zum z‘grosse gschäft erledige - si fei echli aaständig u findi no e dankbare fakt🚽.

4. u ds letste hani vergässe...

dr aabe heimer de mit emne salat u süppli la usklinge. zu üsere fröid hei d‘nachbare wo mitnis d‘chuchi teile es glas nutella la lige... so simer de mit emne dicke löffu im zimmer verschwunde u hei das stückli glück fest gnosse🍫🥄.

u no hurti zu üsere gsundheit: mir hei üsi schweri malaria grippe bekämpft u es geit bärguuf. d‘wcpapier roue isch aber glich no dr ständig begleiter für üsi nase🧻.

jael - 18.08.19Read more