Belén

Mier hend si erwarted. Mier hend gwüsst, irgendwenn chund si. Mier hend üs über usstigendi Motore, Achseschenkelbolze-Brüch wiiet ab vo de Zivilisation und kaputti Bremse Gedanke gmacht. Aber das di erschti Panne in Form vommene abbrochene Zündschlüssel (zum Glück nid im Zündschloss) würd in Erschinig trette wer eus nid in Sinn cho.
In Belen Argentinie isch denn aber genau da passiert. Mier hend zwei Schlüssel zum Auto, aber nur eine cha de Motor alah. Und de isch (zerscht) verbroche....
Möglichi Szenarie ab dem Moment:
- Mer dünd s Auto churzschlüsse, und fahred so wiiter.... - - >Leider kennemer da beidi nur us alte action Film, und hend kei Ahnig vor Praxis.
- mer chessled 10h mit em Bus uf Salta und 10h wieder zrugg, zum dött innere Mercedes Garage en neue Schlüssel la mache wo denn vielleicht passt.
- mier hend Glück.

Mer hend eus für Szenario 3 entschide.
Z Fuess hemmer eus ufe Weg is Zentrum vo Belen (15'000 Seele Städtli) gmacht, wo mer schliesslich im skurilschte chline Lade, wo Pullover und Schue vo Aliexpress verchauft und nebebie no Schlüssel kopiert (jop, seeeehr vertrauenswürdig😅) euse kaputti Schlüssel vom Marco hend la kopiere.

D Kopie hed im erschte Versuech nid funktioniert. Und mier hend eus innerlich scho uf Szenario 2 afa istelle.
Aber de Marco heds zu sinere eigete chline Mission gmacht, das er eus nid will im Stich lah. Zitat (übersetzt) : "Wenns mit de Kopie nid klapped, denn Lötemer de Orginalschlüssel wieder zemme."
Um Mitternacht isch de Marco schliesslich mit meh Schlüssel bi eus ufem Camping uftaucht, wo zemme mit em Chip vom Originalschlüssel und bitz Isolierband wo alles zemmehebt, euse Janosch wieder hed la id Gäng cho.
De Marco isch euse persönlichi Reiseheld!!!

Trotzdem heder eus wermschtens as Herz gleid, das mer ziitnöch uf Salta fahred, und eus döt binnere Mercedes Garage en weniger provisorische Schlüssel lönd lah mache.

Und da hemmer eus z Herze gnoh.
Am 24.12 simmer am 6.30 in Belen losgfahre und nach 7h Fahrt am 14.00 in Salta acho.
Wenn den
d Läde nach
de Feschtteg wieder offe sind, gids (hoffentlich) en neue Autoschlüssel.

Aber bis denn, essemer hie gmüetlich euses Wiehnächtliche Fondeu Chinouoise bi 33°C und wünsched eu allne Marry Christmas, ganz viel Liebi, und frohi Feschttäg.Read more