Cerro Agualoma

Hüt het euse Wecker am viertel vor 7ni glüütet. Mir hend eusi Sache packt und uscheckt. Am viertelab 7ni het eus euse Tourguide für de hütig Tag abgholt. Mir gönd nämlich go Bike! Im Tourbus isch scho es schwiizer Päärli gsesse, wo mir ez auscho paar Mal gseh hend. Es französisches Päärli wo mer auscho gseh hend, sind auno zue gstiige und scho het sichs ahgfühlt wie sone Art Reunion. Mir sind mitem Bus zum Startpunkt vo eusere Route gfahre. In La Cumbre uf 4700 müM hemmer uf eusi Mountainbikes gwechsled. Vor eus ligged ca. 61 km aber zum Glück alles durab. Euses Ziel isch nämlich nur uf 1200 müM. Die Strecki wird au liebevoll „the death road“ gnennt und isch 1995 au die gföhlichsti Strass überhaupt gsi. Bis jetzt sind scho 3000 Lüt gstorbe, wo det dure gfahre sind und Kurvene sind nach ihrem Herkunftsland benennt worde. Aber jetzt isch natürlich alles sicherer worde. Mir hend die Kilometer in ca 4h mit ganz viel Pausene und Snacks hinter eus bracht und es isch richtig schön gsi, wiedermal chli Velo z‘fahre. Aber ganz ohni Unfäll isches glich nid gange. Eine us de Gruppe isch recht dumm uf d‘Rippe gheit und het drum nacher au welle in Spital und bimene andere isch währendem fahre s‘Velo usenand gheit😂 Aber trotz allem
chönd mir eus stolz survivers of the death road nenne. Ufem Rückweg richtig La Paz hemmer imene Resti na ghaltet und hend Zmittag gesse und chöne dusche. 3h hemmer ca müesse fahre bis sie eus am Busterminal usegrüehrt hend. Mir hend aber na vorig Ziit gha bis de Bus schlussendlich fahrt und hend drum bimene Imbisstand no 2 Empanadas und en Tee gholt. Wo mir denn pünktlich 19:30 bim Büro vo eusere Buslinie gsi sind und s‘Billet geh hend, hend die 2 unglaublich sympathische Fraue s‘Billet gnoh und zersch mal nüt gseit und gmacht. Mir hend denn mal schüch nahgfröged was mer ez mönd mache und sie hend denn gseit: Ja de Bus fahri nid, sie sueched grad en andere mir müend eus ez chli gedulde🤦🏻‍♀️ Da mir gwüsst hend, das all Büs uf Sucre am 8i fahred und keine spöter simmer grad chli gnervt und gstresst gsi. Mir hend den s‘Geld zruggverlangt und selber en andere gsuecht. Öppe s‘4te Hüüsli hett na 2 Plätz für eus gha und mir hend na chöne in Bus stiige. Obwohl de denn eh knappi Stund verspötig gha het, simmer froh gsi, hemmer na en Weg us La Paz gfunde.Read more