Pura Pura

De Tag simmer hüt mit spezielle News gstartet. Mir hend mitübercho das de Präsident vo Peru festgnoh worde isch (mer het en Staatsstreich vermuetet etc…) Ez isch glaubs rechte tumult ih dem Land. Vorallem in Lima. Zum Glück sind mir ez scho in Bolivie… Go Zmörgele simmer im Cafe del Mundo. Am 10ni simmer den zum Plaza Sucre gloffe, will det üsi Free-Walking Tour gstartet het. Direkt am Plaza Sucre isch au grad s‘Gfängnis vo La Paz: San Pedro. Das Gfängnis isch ursprünglich für 400 Insasse gmacht gsi. Mittlerwiile umfassts aber bis zu 3000 Häftling uf nur 10 Poliziste. So isches wie eh eigeni Stadt wo sich selber mit Präsident und Vizepräsident etc verwaltet. Sie hend au es eignigs Kokslabor det ine😂. Sogar d‘Familie dörf mitem Vater det wohne. Wieso au immer sie das wänd? Wiiter simmer dur de Mercado Rodriges gloffe, wos au ih jedere grössere Stadt da het. Ganz normali Läde so wie mirs mitem Coop kenned, gits da selte. Denn simmer no dur de Mercado de las Brujas gloffe. En eher unheimliche Märt. Überall hets toti Baby-Lamas zum verchaufe gha. Da Bolivie es sehr abergläubisches Land isch, werded die immerna für spezielli Ritual verbrennt. Wemmer sich nämlich öppis wünscht, chamer das und chli Alkohol verbrenne und Pacha Mama (Mother Earth) schmöckt denn usem Rauch use, was mer will. Baby-Lamas werded au hüüfig brucht um d‘Muetter Erde vorem Huusbau nach Erlaubnis zfröge, will s‘Land eich nid dir ghört, sondern ihre. De Gedanke dehinter findi eich na cool, d‘Umsetzig eher weniger. Nach de Free-Walking Tour hemmer mit de Teleferico chli welle umefrääse. De grossi Märt in El Alto wos jede Dunschtig und Sunntig git, het sich da grad anerbote. Mir hend zersch mit de violette und den mit de silbrige Linie müesse fahre. De Märt hemmer scho vo wiitem gseh, de isch soo gross gsi. Würklich de ganzi Stadtteil isch voller Ständ gsi. Egal was mer suecht, mer findets dete. Und das mein ich so wie ichs seg. Es git würklich alles. Vo Chleider zu de chliinste Autoteili bis hii zu Tieraccessoires. Nacher simmer mit de silbrige und gelbe Linie zunere Mall gfahre imene chli neuere und suubere Stadtteil. Ih dere Mall hemmer nur eis Ziel gha und zwar de Cinnabon. Das Kaffi het Jenny no vo Amerika kennt und es sötti dete die feinste Zimtrolle überhaupt ha. Maximal ghyped hemmer 2 bstellt und sie sind würklich unglaublich geil gsi. De Umweg det hii het sich defintiv glohnt gha. Mit de blaue Linie simmer den zrugg id Altstadt gfahre. Ich bin echt beeidruckt vo dem Teleferico-System. Es isch au alles richtig suuber und modern und funktioniert ihwand frei. Mer merkt richtig, dasses s’Chronjuwell vo de Stadt isch. Nacher hemmer eich nachli welle dur de Mercado spaziere und Souvenir poste, aber mir sind so fix und fertig vo dere kack Höchi gsi. Jede Steggetritt macht dich eifach fertig und langsam hemmer d‘Schnauze voll. Mir hend grad googled wie höch Sucre isch und wo mer glese hend, dass sie „nur“ uf 2800 müM isch, simmer grad chli zfriedener gsi. Uf all Fäll simmer den zersch is Hostel chli go usruebe. Hunger hemmer nach dere Cinnamon Roll eh nanig gha… irgendwenn so uf die halbi 8i hemmer eus nomal usegschleppt und sind im greens Bolivia eh Bowl go esse. Zrugg im Hostel hemmer dusched und na müesse packe. Da mer morn eh Tagestour mached und denn direkt as Busterminal gönd, isch s‘packe eh chliini Heruusforderig gsi. Da mer morn au früeh mönd ufstah, isches gar nid sooo schlimm gsi, simmer am 9ni schowieder im Nest gsi^^Read more