Kota Kinabalu & Mulu National Park

Kota Kinabalu isch chli dr Usgangspunkt vom Malaysische Borneo, mite meiste destination wo chöi agflogä wärdä.
Ha mir hie 4 nächt zum Stadt erkunde und erholig gönnt.
Spezieus hani nid gmacht, z wätter isch o durchzogä gsi: Gwöschet, Kino (Fall guy, empfehlenswärt), Sabah state museum (chame skippä, nur äs skellet vomne bryde whale isch erwähnenswärt, aber wiviu das mitem state vo Sabah z düe het - abgse drvo daser hie gstrandet isch - weisi nid) u Shopping.
U mau wider Spaghetti gässä, herrlech gsi 🥰 sogar es sri lankanischs restaurant hani gfunge, es isch immer no sooo fein, glichi stuefe wi indisch.

När bini i Mulu Nationpark gflogä, ja, scho wider müesse flüge 🙈 git ke angere wäg inä.
Isch aber nur 1h gange miteme chline flüger. Drfür bini zerst mau is schwize cho mitem flüge 😂 zu legere agreiset, u woni icheckt ha bini scho 15 minute nach boarding time gsi, u no dürd security müesse. Aber flüger het verspätig gha 🙈 när hani ewig gwartet 😂 im flüger si sage umd schreibe 14 lüt gsi 😂

woni d ungerkünft agluegt ha, hani viu eifachi homestays gse, und eis luxus 5* resort. Und ja, iz hani mer das mau gönnt, wiui gad ke lust uf schwize, ke empfang usw. gha ha. Aber het haut 5x meh kostet aus di angere 🙈 drum bini nur 2 nacht blibe. Si heimi no ine nechsti kategorie upgradet gratis, hei nid so viu gest gha.

I däm park isch d houbtaktvität Höhläbesichtigung. Es git 4 wo eifach erreichbar si, die hetme mitere gfüehrte tour müesse bueche. Bim erste muesme zersch 4km düre jungle trekkä zum iigang, u es het gschiiiiiffet in strömä 😂 d rägächleider hätti chönn dehei la, hei nüm gnützt. Aber isch ä nice'i abwächslig gsi, bi froh hets grägnet 😜

Eini drvo het di grössti Höhlechammerä vor Welt beherbergt, riiiisig 😱🤩

Fötele ir höhli isch nid mini sterchi auerdings 🙈

Ufem wäg zum flughafe hani ä luschtigä fahrer gha, woni gseit ha dasi vor schwiz bi, heter gmeint au sini angere gest vor schwiz sige au viu grösser aus ig, u ner heter immer wider gdeit "you're so small, other swiss so tall". U immer meh afa lache biser fasch nüm het chönne fahrä 😂😂

U im park isch uf dä toure u o ir nöchi vom hotel no ä Chines wo in Malaysia gebore isch und ir USA läbt umeglungeret. Cheib het AUS gfiumet, stunde! U d höhline (80n höch zum teil) mit dr taschelampe vom natel wöue belüchte 🤷 u miter angere hang heter ä taschelampe gha woner di ganz zit umegfuchltet het u aune is gsicht zündet, es isch müehsam gsi 😂 bim znacht bini no zunim ghocket, dr riis isch woner mitem vouem muu unverständlech gredt het, isch bis zu mir gflogä 🤣
Är seit, er wüss nid wime z natel am pc aschliesst, drum choufter immer es neus natel wenn sini videos ds natel gfüut hei, er het momentan 7 smartphones, u jederzit 2 drbi 😂

Si no ane Penan-märit, ds isch z volk wo bruno manser isch gsi. Aber eher ä touri falle gsi, vo dä true-ä dschungubewohner gits schins mittlerwile no weniger 300, u die zie immer witer.

Ir höhli si schiins 5 millione flädermüs, wo bi guetem wätter in schwärmä useflüge. Das chame beobachte, het aber 2 alöif brucht (2 tag jeweils 7km z fuess) wägem rägä.

När bini bi guetem wätter - zum glück wiu schüsch flüge si offebar nid - wider uf kota kinabalu gangä. Ir nöchi vom flughafe übernachtet um hüt am morge am 6i uf Taiwan z flüge 🙌Read more