Serbien & Mazedonien I

Am nechste Tag bini relativ schnäu überd Grenze nach Serbie. Sofort faut uf: hie fahre si nüm wi di hohlä (sondern sehr aständig) 🙊 und viu weniger vercher.

Bi uf Nis gfahre, e Stadt scho eher südlech in Serbiä. Chli sightseeing und per zuefau gad amne Tag wo Djokovic in Wimbledon match het gha dert gsi, de hani mi zur abwächslig mau wine Djokovic fan verhaute u ha a eim vode zahriche orte wosinä zeigt hei match gluegt 🙊

Nechst tag witer i süde gfahre u zmittag gesse in Vranje. D lüt allgemein heimi sehr fründlech dünkt, ou hie im Kontrast Zu Rumäniä wome im Uber ir regu kes wort usem fahrer cha chützlä🫠

Am nami direkt witer uf Mazedoniä, ewig lang im stou gstange u chli heimat gspürt woni es Berner outo gse ha. Soon.

Übernachtet ir Houbtstadt, Skopje. Het paar nice'i geböide gha u fürne churze ufenthaut hetsmer gfauä.

Am morge früe ner i naheglägnig Matka Canyon, einä vo mehrerne tipps woni vo @Livia becho ha ;-)
Sehr schöns tau gsi u bi ga wandere - no 2 franzosä troffä wo dert wildcampet hei ufem hügu bimne chloster, u a minä Kajakkünst gschliffä 😂
Hetsech sehr glohnt 👏

När uf Krushevo driftet, holprigi strass gsi 🫣 schöns, abglegnigs, weniger touristischs bergdorf. Eifach ds checkin hie i de ungerkünft siti im Balkan bi isch sehr müehsam, i liebes weme cha bueche u ner eifach id lobby u 30s speter ds chärtli idä finger het. Hie isch entweder niemer ume u me mues müehsam umetelefoniere u hoffe das öber abnimmt, oder mit x chat nachrichtä gnau sägä wenn dasme de achunnt 🥵

Nechst tag witergfahre uf Ohrid. Hie blibi 3 nächt. I ha mir es einzuzimmer imne hostel gno wiui verlange ha gha widermau mit öberem lenger aus 10 minute z redä 😂
Es het nid enttüscht: dr host isch ä komplett verrückte typ womi churz nach akunft gad ufne sightseeing tour mit 2e neue volunteers het mitgno😂 füre nechst tag heter mer no ca. 15 google maps points gsaved🫣😂

Am tag vor akunft het no z Ohrid summer festival agfange, am erste tag si 2 piani u 1 violinkonzert vo jugendleche ire chiuche gsi, ds hani natürlech müese gse 😍

Am nechste tag bini schlussendlech ner o fasch au di pünkt abgfahre, u no vomne thurgauer zueparkt wordä, ä richtigä heud gsi 👎

Hüt am aaabä gits ni es symphoniekonzert imne amphitheater womer gö ga losä, aso zmingst vo usserhaub, wiu dr verrückt typ röit jede rappä 😂Læs mere