Playa Carrillo

Höt hemmer s erste Mou ohni Wecker stelle usgschlofe ond send tatsächlech am 8i uf. 🤷🏽‍♀️ Nochem feine zMorge vom Mami (Gallo Pinto, Rüehrei, Maistortilla ond Platanos maduros usem Garte) hemmer üs metem Mami ond de Julissa ufe Wäg gmacht a Strand.🏝️ Zerst hemmer e Zwöschestopp z Sámara gmacht, send dör d Souvenirlädeli gschländeret ond hend de Strand agluegt.☀️ Dä esch scho wonderschön gse ond d Julia hed aköndiget dos de nöchst no schöner werd. 7km spöter, ade Playa Carrillo hed d Sarah verstande, was gmeint gse esch - WOW! 🤩 So Stränd könnt mer söscht höchstens usem Feriekatalog. Ewige Sandstrand, en Allee us Palme, stahlblaus Wasser ond praktisch kei Lüüt.🌴🌊 So hemmer de Tag im Palme-Schatte verbrocht, send im lauwarme Wasser go bade ond hend zom zMettag Thun-Sandwich gnosse.😍 Ufem Heiwäg hemmer no bim andere Grosi (Abuela Poy) verbi gluegt, wo ou ganz ide Nöchi wohnt.🧓🏾 Weder bide Abuela Gaby hed üs d Tante Grace zeigt, wie si Crocante (en Roulade met Noss-Caramel) macht.😋 Das hemmer de ou grad probiert zonere Tasse Kafi im Schoukelstuehl.☕ Zom zNacht heds wie emmer Casado gä.🍚🫘🍳Read more