Grgoščak

Nach de Kaffepause in Osor hemmer üses wunderschöne AirBnB bezoge, zersch simmer üs nid sicher gsi ob mier wirkli richtig sind, denn so en Luxusbude hemmer für 170 Euro nid erwartet. Doch tatsächlich, die allesamt mit Steibode und Steiwänd uskleidete zwei Badzimmer, zwei Schlafzimmer und wundschöni Chuchi sind in der Tat üses AirBnB.

Doch lang hemmers nid gnosse im AirBnB, denn mier hend no en Mission gha: Bade im Meer. Ufem üsserschte Zipfel vo de Insle hend die gfindige Google Maps Benutzer en chlini Bucht zum Bade gfunde. Doch die Bade-Erfahrig söll hart erarbeitet si, so hend mier mit üsne Sneaker en steinige Wanderweg as Meer abe bezwunge. Doch für die Bilderbuch-Bucht het sich das glohnt. Leider het de Meeresbode au i dere Bucht schwarzi stacheligi Meeresgenosse beherbergt, so hemmer müsse mit gröschter Vorsicht is Gewässer stige zum üs abküehle. Nachdem mer denn de steinigi Wanderweg bergaufwärts au no bezwunge hend (schweissgebadet) hemmer üs die feini Pizza im Hafe vo Mali Losinj redlich verdient.

Denn simmer mit de Plötze no zrugg is AirBnB gritte, hend üs no en Schlummertrunk genehmigt und so het de herrlichi Tag es Endi gfunde. Wies witergaht erfahred mier und ier morn, danke fürs lese :)Read more