Tumbabiro

De hüttig Tag started au mit Sunne und emene riichhaltige Zmorge. Teil devo isch min Chueche, wo also guet usecho isch :) D'Schuel isch wider astrengend aber au intressant. Euse Lehrer redt sehr gern, was am afang bitz störend gwürkt hät aber eigentlich isches für mich super zum allerlei Theorie festige. Und nebedbi erfahremer au na einiges über s'Land, d'Kultur und sini Lebensistellige :) Zmittag gits hüt dehei und zwar Fritadas. Fritada heisst uf dütsch eifach "koched". Es beinhalted so viel ich verstande han also eifach verschideni kocheti Sache womer nach eigne Vorliebe chan zemestelle und isch typisch ecuadorianisch ^^
Nachher hani bitz Ziit für mich und irgendwenn schlüpfi wider i Sportchleider und probiere das mit Jogge namel. Es isch tatsächlich viel agnehmer als in Quito. Bitz weniger höch, bitz meh dra gwöhnt und viel flacher helfed debi. Am Schluss verschiffeds mi na churz aber das isch halb so wild wil als negst stoht na de Bsuech vode Therme Cachimbiro ufem Programm. Mini ganz Gastfamilie und all drü Studis bequemed sich is Auto und fahred los. Und ja, es isch en Füfplätzer aber Chinder chamer ja au guet uf de Chnü oder de Mittelkonsole versorge :) D'Therme sind einiges weniger fancy gstalted als no die in Papallacta aber defür abwechsligsriicher. Mir wähled de Bereich ohni Sprudelsache aber defür mit vielne verschidene Bassins. Langsam arbeitemer eus bis zum wärmste Bad dure und gnüssed denn sehr viel Ziit i sebem mit churze Abchüelige im Iisbad zwüschedine. Ab und zue regeleds es bitzli, was s'Gfühl grad no romantischer macht. Nach zwei Stund womer langsam afanged zu Fisch mutiere, verlömer di tüüfe Gwässer wider in Richtig Auto. Am Afang isches uf de zimli verlassne und ned nume guete Strosse zimli kriminell zum fahre wil d'Belüftig vode Frontschiibe kaputt isch und mir mit eusne füechte Hoor und so füehred dezue, dass d'Schibe extrem beschlönd und mer meh nach Gfühl als nach Sicht fahred. Janu, i ha volls Vertraue in Darío und mir schaffeds au souverän zrugg uf Otavalo. Dasmal sogar au ohni kaputti Reife... Zum na richtig go esse simer z'spoht unterwegs und so wird useme guete Znacht halt als Takeaway-Hamburger esse im Auto 😂Read more